Dingq daxbuz gangj, mwh gou 3 bi, daxbuz bae reih guhhong, aenvih mbouj cuengqsim gou boux dog gag youq ranz, couh daiq gou bae ndaw reih.

Daengz ndaw reih le, daxbuz couh cuengq gou youq gyaeuj reih gag guhcaemz, de swhgeij couh bae ciemz rum lo. Gou hix bang daxbuz ciemz rum, gizsaed gou mbouj rox go lawz dwg gorum, go lawz dwg gomiuz, luenh ciemz sam ciengz. Doeklaeng gou couh moengjmoengj doengjdoengj ninz ndaek lo. Byawz rox gou ninz ndaej dingh lai, daxbuz lumz gou lo. Daxbuz ciemz rum sat le couh gag ma ranz. Daengz gyanghaemh, daxbuz cij fatyienh gou mbouj raen lo, vunz ndaw ranz heuh daengx mbanj vunz dauqcawq bae ra gou. Dingq gangj, daxgoeng daxbuz cungj daej daengz buh cungj dumz lo, duzma ndaw ranz hix seiqlengq luenh nyouq. Daxgoeng naeuz: “Lwgnyez mbouj raen lo, duzma hix gip lo.” Doeklaeng, duzma raeuq geij sing le, couh buet coh ndaw reih bae. Seizde, daxbuz siengsim ndaej moengjdoengj haenx cij siengj hwnj, gou aiq youq ndaw reih.

Daengz ndaw reih, vunz ndaw mbanj dauqcawq bae ra, doeklaeng ndaej duzma bang, youq giz dieg rum he ra raen gou lo. Seizhaenx gou lij ninz ndaek sisi ne!

(haj nienzgaep Cuih Hanz)