Gyoengq doengzhag, daez hwnj duzdaek, daihgya aiq dwg cungj rox. Duzdaek daengx ndang saekheu、saekhenjgeq roxnaeuz saekndaem, gij saek neix youq aen vanzging gwndaenj de haenx ndaej baujhoh de. Aen’gyaeuj duzdaek gig hung, song diuz gokmumh de haemq dinj, yiengh lumj diuzbien; aenlaeng duenh henz gyaeuj haemq geng, lumj aen anmax nei iet coh song mbiengj.

Duzdaek yienznaeuz iq, hoeng de dwg boux dijyuz maenh’ak caux giluz bw. De ndaej yat gvaq beij aenndang swhgeij raez 10-20 boix gyae, vanzlij mbouj yungh yawhsien buet daeuj bang yat dem. Mboujgvaq vah gangj dauqma, aenndang duzdaek couh dwg vih diuqyat maj baenz yienghhaenx. Song gaiq galaeng de daegbied raez、daegbied miz rengz, galaeng hoh gwnz gij noh bongq hwnj haenx youh na youz naih doengh yat, baihndaw rom miz haujlai naengzliengh, lij ndaej gig vaiq cuengq ok gij naengzliengh neix. Mboujgvaq, galaeng duzdaek cij hab diuqyat, ndigah mwh de byaij seiz dauqfanj yienhndaej gig mbouj lingz. Dang duzdaek yaek yat seiz, seiq gaiq ga iq de couh dawz aenndang duenh baihnaj cengj hwnj, galaeng vangoz, yienzhaeuh sawqmwh iet soh, dawz swhgeij danh hwnj byonghmbwn. Yienghneix baez yat baez yat yat bae naj, gij vaiqmenh de beij dingzlai nonnengz baengh buet daeuj byaij haenx vaiq 10 boix.

Duzdaek bak hung, aenhangz gig fatdad, dwg duz gwn mbaw doenghgo, daegbied gyaez gwn go- em、gohaz、gohaeux daengjdaengj. Daengx seiq- gyaiq miz mauhgvaq 12000 cungj daek, faenbouh youq gizdieg ranghhwngq、diegnywj ranghraeuj caeuq dieg sahmoz. (Lij Dingz)