Miz ngoenz he, haeux- ngaiz hagdangz mbouj hab bak gou, gou cij gwn di ndeu, banringz lij caengz cuengqhag, dungx gou gaenq iekngaungau lo, gou roxnyinh seizneix hawj gou duz vaiz ndeu, gou cungj gyan ndaej roengz dungx bae. Gou couh gag bae siengj gak cungj gijgwn ndei gwn, siengj dwk siengj dwk, myaiz cungj yaek rih roengzdaeuj lo.

Baez cuengqhag, gou couh buet ma ranz. Hoeng daengz ranz baez yawj, gwnz daiz ndaw ranz cij miz mbaw ceijdiuz ndeu, gwnz ceij sij miz: “Hanzhanz, daxmeh haemh neix gyaban, banhaemh 7 diemj cung daengz ranz, mwngz genhciz yaep ndeu, caj daxmeh ma ranz cawj ndei gwn hawj mwngz.” Gou buet haeuj ranzdajcawj bae ra gijgwn, ra liux lo cungj mbouj ra ndaej saek di gwn, gou sikhaek doeknaiq lo. Gou ngawzrwd naengh youq gwnz sahfaz, gag gangj gag naeuz: “Daxmeh vaiq di ma ranz ba, gou yaek iek dai lo!” Mwhhaenx, gou raen henz gou miz bonj saw 《Gojlwgnyez Saekaeuj》 ndeu, couh dawz daeuj yawj. Gou sikhaek deng gij goj ndaw saw yinx haeujbae lo, sim gou mbin haeuj ndaw saw bae: Mbin daengz ndaw singzbauj caeuq dah gunghcuj diuqfoux, mbin daengz ndaw ciengzgwihmax bae gwih duz- max buet baefoedfoed, mbin daengz ndaw dinggwnngaiz bae gwn gak cungj byaek ndei gwn……. Gou yied yawj yied maez, gij dungxiek gou cungj lumz bae liux lo.

(seiq nienzgaep Cangh Yujhanz)