Youq ndaw da daxmeh, gou dwg boux lwgnyez hagsib ngaiznyed he. Cuengqhag ma ranz, daxmeh cungj dwg coi gou sij cozyez, lij youq henz gamduk gou dem.

Miz haemh ndeu, gou gig sinhoj sij sat cozyez, gaenq yaek gouj diemj cung lo. Daxmeh naeuz: “Gvaiz lo, vaiq di ninz lo.” Gou naengh youq mbouj doengh, duix aen’gyaeuj roengz mbouj guh sing. “Siengj hwnjvangj guhcaemz ha?” Daxmeh baez yawj couh yawj rox gij simgei gou. Gou ngaekngaek gyaeuj. Daxmeh siengjsiengj le, naeuz: “Yienghneix raeuz ciem faenh habdoengz he ba!” “Habdoengz?” Gou doeksaetyat. “Baezlaeng guh cozyez aeu nyinhcaen guh sat guh ndei, cih yaek sij cingq. Cingzcik gaujsi moix goh cungj yaek ndaej goujcib faen doxhwnj, gou couh hawj mwngz moix ngoenz hwnjvangj buenq diemj cung.” Daxmeh gangj gij vah neix, lumjbaenz caeux couh naemj gvaq lo. Gou yaepyaep da naemjnaemj le, roxnyinh habsuenq, couh doengzeiq lo. Daxmeh gig vaiq couh sij ndei faenh habdoengz he, gou youq baihgwnz nyinhcaen ciem aen coh gou.

Daj mwh caeuq daxmeh ciem habdoengz hwnj, gou moix ngoenz hwnjdangz cungj nyinhcaen dingq lauxsae gangjgoq, ma daengz ranz gienh saeh daih’it couh dwg sij cozyez, sij sat le swhgeij lij gag genjcaz baez ndeu, mbouj caiq ngaizngaiz nyednyed lo. Gvaq ndwen he le, gou menhmenh fatyienh, gij hagsib yauliz gou beij gaxgonq daezsang lo, cingzcik hix hwnjbae lo. Yienghneix daxmeh couh ciuq habdoengz sij haenx hawj gou moix ngoenz hwnjvangj buenq diemj cung. Youq gwnz vangj, gou caeuq doengzhag doxcaez daujlun gij vwndiz hagsib caeuq gij saehyinx ndaw youzhi haenx, lij doxiek ngoenzsinghgiz okbae guhcaemz, yienghneix hawj gij gwndaenj gou dem le haujlai saeh angq.

Miz mbaw habdoengz neix le, gou couh miz sibgvenq ndei hagsib lo, hagsib cingzcik hix daezsang lo, vanzlij cingqcingq dangqdangq ndaej hwnjvangj dem, caen dwg guh it ndaej song ha! (sam nienzgaep Goh Yijdingz)