Gyanghaet, gwnzmbwn mongmwtmwt, fwn laeglemx daeuj lo. “Sasasa……” singfwn youh sep youh sangj, raemxfwn lumj seingaenz nei daj gwnzmbwn mbin roengzdaeuj, yiemhranz lae roengz baenz baiz raemxndik, lumj liemzcaw gyaeundei. Raemxfwn doek youq gwnz go’nywj, couh bienqbaenz saek heuoiq; raemxfwn doek youq gwnz rin, couh bienzbaenz saek mongndaem; raemxfwn doek youq gwnz namh, couh bienqbaenz saek namhhenj; raemxfwn doek youq gwnzbiengz, couh bienq- baenz gak saek gak yiengh……raemxfwn caeuq diendeih yungz youq doxcaez, gij saek lai cungj lai yiengh haenx lumj youq ndaw raemxfwn laedoengh, lae haeuj ndawsim gou. Gij raemx neix swiq bae gij uq diendeih, sawj diendeih lai faenh seuqcengh he, lai faenh gyaeundei he. Fwn daeuj ndaej vaiq, bae hix ndaej vaiq. Mbouj rox seizlawz, fwn gaenq laeglemx byaij bae lo. Gyoengq roeg he youq gwnzmbwn gvaengxgvax, lumj dwg doxlwnh dajcaemx gvaq le cwxcaih lai lo nei. Ndik fwn doeklaeng doek youq gyang fajfwngz gou, lumj yiengq gou cam ndei, hix lumj caeuq gou doxbiek……

（seiq nienzgaep Cungh Vanyij）