Buj Sunghlingz gig miz dungxcaiz, hoeng mbouj deng yawjnaek, miz duenh seizgan he, de cij ndei baengh sonsaw gvaq saedceij.

Miz ngoenz ndeu, de cingq hawj hagseng hwnjdangz, miz boux gai makleiz he daj bakdou byaij gvaq, heuh naeuz: “Gai makleiz, makleiz youh hung youh van!”

Buj Sunghlingz raen hagseng deng sing gai mak yinx bae, couh naeuz: “Gij makleiz neix geijlai cienz gaen ndeu? Daihgya sij youq gwnz ceij gyau hwnjdaeuj.”

Miz mbangj hagseng sij sam maenz cienz, miz mbangj sij seiq maenz cienz, miz mbangj sij haj maenz cienz……

Buj Sunghlingz yawj dapgienj itcig ngauz gyaeuj. Doeklaeng, de yawjraen miz mbaw ceij he gwnz de sij “it bak roekcib cienz gaen ndeu” seiz, naj de riu lo, lienzlienz ngaek gyaeuj.

Boux gai makleiz mbouj naeuz makleiz geijlai cienz gaen, yienghneix Buj Sunghlingz vihmaz nyinhnaeuz “it bak roekcib cienz gaen ndeu” dwg deng ne?

Laxlawz, “cienz” hix dwg cizlieng danhvei, cib cienz ndaej daengj liengx he. Youq mwh Cingciuz, gaen ndeu couh dwg cibroek liengx, ndigah gaen ndeu couh daengj it bak roekcib cienz.

(Vangz Gvan)