“Lauxbanj, caiq noix di, ndaej mbouj ndaej?” “Gyaq- cienz neix gaenq dwg ceiq daemq lo, mbouj ndaej caiq noix lo, gaeuq bienzngeiz lo.” Youq aen bouq gai buhvaq he, daxmeh cingq caeuq lauxbanj gangjgyaq.

Ngoenzneix cingq dwg ngoenzsinghgiz, daxmeh naeuz yaek cawx buh moq hawj gou. Loh gvaq aen bouq gaiq buhvaq vunzhung he cingq dajciet, daxmeh rag gou haeujbae yawj- yawj.

Buh ndaw bouq saek miz di ndaem, mbouj hab daxmeh daenj, genj le haujlai nanz, daxmeh dauqdaej genj ndaej geu buh habhoz de lo. De sik- haek caeuq cawjbouq gangjgyaq, hoeng doeklaeng cawjbouq mbouj haengj noix saek faen. Daxmeh rag dawz gou naeuz: “Gyahgyah, byaij, bae cawx buh mwngz.”

Neix dwg aen bouq gai buhvaq lwgnyez mingzbaiz he, gyaqcienz gig bengz. Daxmeh hawj gou gag bae genj. Gou yawj bae yawj dauq, doeklaeng yawj hwnj diuz vaq niuzcaijgu gya yungz he, saek lamzoiq, gavaq miz baiz cihmeh he daeuj cang, gig ndei yawj.

Gou haeuj ndaw rug sawq buhvaq bae daenj geu vaq neix hwnj ndang, raeujrubrub, caen cwxcaih. Yawjyawj ndaw gingq, youh hab ndang youh ndei yawj. Gou daenj hwnj ndang le couh mbouj siengj duet roengzdaeuj lo.

Daxmeh raen gou gyaez diuz vaq neix, couh bae gyau cienz. Diuz vaq neix bak maenz ngaenz bw, daxmeh cix mbouj yaemhywx saek di couh gyau cienz lo.

Youq gwnz loh ma ranz, siengj hwnj gij cingzhingz daxmeh caeuq cawjbouq gangj- gyaq, ndaeng gou baez soemj, gingqyienz miz di siengj daej lo. Daxmeh vih gou cawx le geij geu buhvaq gyaqcienz haemq bengz haenx, hoeng swhgeij lienz geu buh dajciet he cungj mbouj sij ndaej cawx.

Gij gyaez daxmeh gizgiz cungj miz, cijaeu mwngz louzsim cazyawj, couh yawj ndaej raen daxmeh seizseiz cungj gyaez mwngz. (roek nienzgaep Yungz Gyahgyah)