Meggangj henjcug, vavuengzgae haih va, rongfaengx fat ok gij heiq homfwd, daxmeh haetromh couh dawz diuz sai haj saek laenz ndei haenx cug youq hozfwngz gou, couh yienghneix, gou youh coux daeuj aen ciet nguxnyied co’ngux homfwd diemzsi he.

Nguxnyied co’ngux dwg aen ciet conzdungj guek raeuz he, daengz seizneix gaenq miz song cienz lai bi lizsij lo. Gij goekgaen de dwg youq mwh Cincou Cangoz, hainduj dwg caeq boux Gizyenz hamzhaemz diuq roengz Dahmilozgyangh bae dai haenx. Ging- gvaq geijlai aen cinhah coudoeng, ciet nguxnyied co’ngux youq ndaw haujlai ciet conzdungj ndaej baujlouz roengz- daeuj lo. De mbouj dandan dwg aen ciet he, engq dwg cungj cingsaenz Cunghvaz minzcuz he.

Moix bi daengz ngoenz nguxnyied co’ngux, ceiq nauhyied couh dwg suek faengx. Gou ceiq gyaez yawj daxmeh suek faengx lo, daxmeh sien dwg dawz rongfaengx swiq ndaej seuqsatsat, yienzhaeuh fwngzswix dawz rongfaengx, fwngzgvaz daek haeuxcid cuengq roengz rongfaengx bae, caiq gya di duh roxnaeuz noh, suek gij faengx miz aen samgak miz aen raez. Cuengq roengz gu bae cawj, cawj ok gij feih daengx ranz cungj hom. Gij faengx ngamq cawj cug haenx ndat fwdfwd, gou dawz daeuj gwn, unqnemnem, homfwtfwt, caen ndei gwn ha!

Gij fungsug ciet nguxnyied co- ngux gak dieg mbouj doxdoengz, miz mbangj dieg vad ruzlungz doxdax, bihaenx gou caeuq daxboh bae yawj ruzlungz doxdax, gizde vunz lai vunz daih, gou caeuq daxboh feiq haujlai rengz caenx haeuj geh vunz bae, yawjraen ndaw dah miz caet bet aen ruzlungz, aen gyaeujruz dwg gyaeuj- lungz, gyaeujruz cingq ngiengx aen- gyaeuj caj doxdax hainduj. Ndwn youq gyaeujruz dwg bouxroqgyong, youq riengruz dwg bouxgaemdox, cungqgyang cibgeij boux vunz gaem fagcauh, lumj hawj ruzlungz an hwnj gaiqfwed nei. Mwh bouxcaizbuenq roengzlingh, sojmiz gij ruz couh doxcaez cung okbae, lumj fagnaq lizhai aengung nei bongh baefwdfwd. Gwnz ruz henz hamq, singgyong yiengjhumhum, boux vad ruz riengz singgyong haenqrengz vad baenaj……

Dingqgangj miz mbangj dieg youq ngoenz nguxnyied co’ngux, gyoengqvunz yaek raek daehywhom, gwn laeujhenj, dieg gou dwg lwgnyez hozfwngz cug saihajsaek, bakdou baek go’ngaih, dingqgangj dwg ndaej gyaep fangz ndoj rwix.

Gyonj daeuj gangj, moix aen ciet cungj miz aen goj ndeidingq he caeuq aen conzdungj cigndaej raeuz bae swnj he ba.

(roek nienzgaep Ya Lungzyij)