5 nyied 18 hauh, youz Gvangjsih Vwnzlenz caeuq Liujcouh Si Vwnzlenz lienzhab cawjbanh “cien mbanj fanh hoh vwnzyi veiminz gunghcwngz”, Liujcouh Si ranzmbanj yienjheiq hozdung youq Sanhgyangh Dungcuz Swyiyen Dohyeh Gvangjcangz gawjhengz, gyoengq mbanjranz vwnzyi daiqbiuj daj baihbaek sam aen yienh Yungzanh、Yungzsuij、Sanhgyangh daengj daeuj haenx doengz daiz yienjheiq, aeu aenvenz caijdangz、minzcuz gofoux、caijdiu、siujbinj daengj cezmuz lai cungj lai yiengh, vih Dungcuz beixnuengx soengq hwnj ciengz heiq ndei yawj he.

“Cien mbanj fanh hoh vwnzyi veiminz gunghcwngz” dwg gaenh geij bi neix daeuj Gvangjsih Vwnzlenz doiguh cungdenj vwnzva veiminz hanghmoeg binjbaiz. Eiqsae de dwg doenggvaq haeujlaeg dingjnanz bae guh veiminz hozdung, laebguh hwnj youhsiu conzdungj vwnzva swnjcienz dijhi. Sanhgyangh baengzgawq gij yienh cingz bonjfaenh, mienh yiengq lajmbanj, fuzvu vunzlai, roengzrengz doihaeuj vwnzva lijyouz doxhab fazcanj, dwk yiengj“gvangjcangz ngoenzngoenz yienj, minzsuz ndwenndwen ciet”vwnzva binjbaiz, roengzrengz daezswng ranzmbanj beksingq vuenyungz ceijsoq, gonqlaeng ndaej daengx guek vwnzva senhcinj yienh、daengx guek lijyouz biucinjvaq sifan yienh daengj cwnghauh.

(Gungh Bujgangh/龚普康)