Gaxgonq, miz ranz vunz he, miz gyagoeng、gyabuz、daeglwg、lwgbawx seiq boux vunz. Ranz vunz neix doxgingq doxgyaez gvaq saedceij.

Miz baez ndeu, gyabuz baenzbingh lo, lwgbawx cawj vanj raemxdang caem cawj gaeqmeh he. Cawj ndei le, dingjlingz gyabuz ninzndaek lo, lwgbawx couh dawz vanjdang cuengq youq gwnz daiz le bae gueng gaeq lo. Mwhhaenx, duz mahenj hung haeuj ranz daeuj, dawz vanj raemxdang gwn bae lo.

Lwgbawx gueng gaeq le haeuj ranz baez yawj, gip ndaej daej naeuz:“Cungj gvaiq gou, gou mbouj daezfuengz duz mahenj haeuj ranz……”

Gyabuz hix ndiu lo, nai lwgbawx naeuz:“Gienh saeh neix cungj gvaq daxmeh. Bonjlaiz wnggai ndiu lo, hoeng gou bienbien youh ninzndaek lo.”

Gyagoeng hix byaij gvaq- daeuj naeuz:“Neix dwg gvaiq gou. Gou mingzmingz yawjraen lwgbawx bae gueng gaeq, cix mbouj bang de, danghnaeuz bang de le de haeuj ranz heuh mwngz gwn dang……”

Seizhaenx, daeglwg byaij haeujdaeuj, nai bohmeh naeuz: “Boh, meh, sou gaej gangj lo, neix dwg gvaiq gou. Gou bonjlaiz gyanghaet hwnqdaeuj, couh wnggai daiq duzma okbae dwknyaen, hoeng ranznden miz vunz dwkgeiz, gou bienbien buet bae yawj lo.”

Saehcingz yienznaeuz fat- seng lo, hoeng daengx ranz vunz ceng dwk dawz gij loek lamx hwnj ndang swhgeij, sawj ciengz ngaekngeu he couh yienghneix siucawz lo.

Youq ndaw gwndaenj raeuz, vunz caeuq vunz mienx mbouj ndaej miz doxdaemj. Danghnaeuz doxdaemj le, song miengj lumj ranz vunz neix doxnyiengh, cawjdoengh bae rapdawz cwzyin, lij miz gijmaz ngaekngeu caeuq doxdaemj mbouj ndaej gaijgez ne?

(Cwngh Hungzgenh)