Gou miz daegnuengx he, cohnoix heuh “Duhduh”. De bizbwdbwd, lumj aen nohyienz he, dwggyaez raixcaix.

Miz baez ndeu, gou rag Duhduh bae swiq ndang. De youh daej youh hemq, mbouj haengj swiq, yungh rengz cak ok gaiqfwngz gou. Gou mbouj siujsim baez soeng fwngz, de couh buetdeuz lo. Gou feiq haujlai rengz cij gaeb ndaej dawz de, hoeng de cix daejnga- nga lo. Yawjraen daegnuengx daej le, gou couh mbouj rox baenzlawz guh. Sawqmwh, uk gou baez cienq, siengj ok aen banhfap ndei ndeu. Gou doiq Duhduh naeuz:“Raeuz mbouj swiq ndang lo, dahcej veh fuk veh he hawj mwngz yawj, ndei mbouj ndei ha?” “Ndei ha!” De sikhaek mbouj daej lo, aennaj de riu lo. Gou ndawsim gag angq, gij banhfap gou caen miz yungh. Gou veh duz meuzraiz uqatat he, cam daegnuengx: “Duzmeuz neix ndei yawj lwi?” De ngauzngauz gyaeuj, naeuz: “Mbouj ndei yawj, mbouj ndei yawj, daiq uq lo.” Gou ganjgip swngzgei naeuz: “Dangh- naeuz mwngz mbouj swiq ndang, couh caeuq duz meuz neix yienghhaenx uq lo.” “Gou mbouj bw, gou mbouj siengj bienqbaenz duzmeuz neix!” Daegnuengx gangj sat couh gvaigvai rag gou bae swiq ndang lo.

Neix couh dwg daegnuengx gou, de gig dwggyaez ba?

(sam nienzgaep Cangh Swhyenz)