Gou maj ndaej youh sang youh maengh, bouxwnq baez yawjraen gou, cungj laihnaeuz gou dwg boux gyaez yindung he. Gizsaed mbouj dwg, gou dwg boux sawmaez iq he. Cijaeu baez gangj daengz saw, gou couh miz cingsaenz.

Gwnz gyaqsaw gou baij rim gak cungj gak yiengh saw, miz 《Sam Guek Yenjyi》 、 《Ngoenzgeiq Meuzriu》、 《Dinghdingh Danghdangh》、 《Boux- damq Mizmingz Gohnanz》 daengj 300 lai bonj saw. Gij saw neix gou cungj yawj gvaq, miz mbangj gou lij yawj gvaq mbouj cij bienq he. Gou daegbied gyaez gij saw sij gij goj lizsij caeuq gij goj damqcaz mwh sam guek seizgeiz haenx. Daxmeh gou bang gou dingh saw 《Ciugaep Saenzdamq Iq》，Saw baez daengz, gou itdingh mbat ndeu yawj sat. Daxboh ciq hawj gou dauq saw《Manva Sijgi》 he, gou ngoenz ndeu yawj bonj ndeu, lij roxnyinh mbouj gvaqyinx. Gou bingz- seiz sij cozyez haemq vaiq, gij seizgan wnq cungj ca mbouj lai yungh daeuj doegsaw. Doegsaw gaenq baenz gij sibgvenq gou, danghnaeuz ngoenzlawz mbouj ndaej doegsaw, ndawsim gou couh hoengqvangvang, cungj dwg gamjdaengz noix di gijmaz.

Geiq ndaej miz baez ndeu, gou cawx ndaej bonj saw《Gij Gyauyuz Gyaez》ndeu. Ngamq ma daengz ranz, gou couh dawz saw cig haeuj aen rugsaw iq gou bae, gig mizyinx dwk yawj roengzbae. Gvaq yaep he, daxmeh heuh gou gwn ngaiz, gou siengj cungj mbouj siengj couh han sing he, hoeng caekhaex cix doengh cungj mbouj doengh. Youh gvaq yaep ndeu, daxmeh youh heuh: “Baenzlawz lij caengz okdaeuj? Haeux cungj yaek liengz lo!” Gou daenq aenndang mbat he, gaem bonjsaw ok rugsaw daeuj, youh naengh youq gwnz sahfaz ndaw ding yawj saw. Daxmeh raen gou lij caengz gwn haeux, couh miz di hozndat lo. Gou ganjgip cuengq saw roengzdaeuj, gaem aen vanj gwnguk dwk gwnz haeux, mbouj daengz haj faen cung, couh gwn liux lo. Gou baez gwn liux, youh bae yawj saw lo.

Doegsaw dwg cungj yiengjsouh he, de hawj aensim gou daiq hwnj gvaengxrongh ceiq gyaeundei, hawj gou miz saenqsim, miz mbei beij vunz hung. Baenzlawz yiengh, gou suenq dwg boux sawmaez iq he ba?

(seiq nienzgaep Yinh Yisiengz)