Youq ndaw seiqgyaiq gou, doengzdoih gou mbouj dandan dwg it ngeih boux, dwg baenz bang bae. Mboujgvaq, baengzyoux ceiq ndei vanzlij dwg Siujsaengq.

De ya, maj miz doiq da ndongqliklik ndeu, song fwngz youh hung youh miz rengz, byoemgyaeuj ndaemndatndat, aen- dungx biz de ciengzseiz loh ok noh hau daeuj, vamingz de dwg“daegbiz”, de youh coengmingz youh haengj bang vunz, youq ndaw ban gyoengq doengzhag heuh de guh “fouz dig Audwzman”.

Geiq ndaej miz baez ndeu, gou caeuq de bae cauhsi cawx doxgaiq. Gou caeuq de ngamq okdou, couh yawjraen boux daxbuz byoemgyaeuj hau ndeu caeuq boux lwgmbauq ndeu doxceng, boux lwgmbauq haenx ndangsang 1.8 mij doxhwnj. Siujsaengq doiq gou naeuz:“Raeuz bae yawjyawj!”Gou caeuq de ndwn youq gizhaenx yawj yaep ndeu, cij rox vihmaz doxceng. Laxlawz dwg boux lwgmbauq haenx haep daxbuz aeu ngaenz, boux daxbuz byoemgyaeuj hausaksak haenx mbouj hawj de. Boux lwgmbauq haenx gig hozndat, couh yungh rengz nyoengx daxbuz bat ndeu, daxbuz saemxsaemx saxsax doiq dauqlaeng, ceng di laemx roengz. Gyoengqvunz cungj yungh lwgda yawj mbouj hwnj haenx bae yawj boux lwgmbauq haenx, hoeng cungj mbouj miz saek boux vunz bae naeuz boux lwgmbauq neix. Siujsaengq simgip raixcaix, de mwh gip bienq gvai hemq naeuz:“Gingjcaz daeuj lo, gingjcaz daeuj lo.”Boux lwgmbauq haenx dingqyi naeuz miz gingjcaz daeuj, gipmuengz cienq ndang couh buet. Boux lwgmbauq haenx buet deuz le, gyoengqvunz cungj yaengx mehfwngz hwnjdaeuj haenh naeuz:“Daeg lwg’iq neix caen coengmingz, nienzgeij iqiq couh rox yienghneix gyaepdeuz boux vunzvaih.” Siujsaengq naeuz:“Docih daihgya haenh gou. ” Gangj sat de couh angqvauvau dwk gaem fwngz gou bae cawx doxgaiq lo.

Siujsaengq caen coengmingz, gou gig boiqfug de!

（指导老师：覃红梅）