Seizcin daengz lo, dienheiq yied daeuj yied raeuj lo. Gyoengq siujbaengzyoux vuenh hwnj buhmoq seizcin, byaij ok ranz bae singzrog youz. Vagoliux yawjraen le, cak ok ndawrungj daxmeh, hix buet okdaeuj guhcaemz lo.

Valiux daenj geu vunj hau ndeu, soengsoeng yungzyungz, unqnemq mbaeumbet, songsong samsam comz youq doxcaez, couh lumj nyeuq siet he, youh lumj benq fwj he. Gyoengqde baez daeujdaengz gyangmbwn, couh engq angq lo, miz mbangj gyaep, miz mbangj buet, miz mbangj lij fandingqdaeuj. Gou lumj dingqnyi gij singriu gyoengqde lo.

Valiux mizyinx lai lo. Gou siengj gaebdawz gyoengqde, cingj gyoengqde caeuq gou guhcaemz yaep he. Seizhaenx, cingq ngamj miz nyeuq va he mbin coh gou. Gou ganjgip gop song fajfwngz, gaebdawz gyoengqde. Gou siengj sijsaeq yawjyawj valiux dauqdaej maj baenzlawz yiengh, hoeng mwh aj song fajfwngz, gyoengqde gingqyienz vaiqvet mbin deuz lo.

Valiux mbin bae lo, gou riu lo.

(it nienzgaep Sung Sinhyui)