Gou mwh iq gig dam guhcaemz, baez ndaej guhcaemz gijmaz hagsib ha, lijsiengj ha cungj lumz liux, hagsib cingzcik gou youq ndaw ban itcig dwg baiz youq doeklaeng. Vihliux gou hagsib miz cinbu, bohmeh gou gijmaz banhfap cungj yungh lo, hoeng mbouj miz saek di yungh.

Mwh hwnj siujhag seiq nienz- gaep, ndaw ban dah ceiq gyaeu Vangz Siujyah bingh lo, boh de daiq de bae ndaw sengjsingz yawj bingh. Dauqma le, Vangz Siujyah naeuz, boh de daiq de bae bozvuzgvanj ndaw sengj yawj canjlanj lo, baihndaw ndei yawj dangqmaz. Doengzhag ndaw ban gig hozhaenz Vangz Siujyah, gou hix dwg. Ma daengz ranz, gou dawz aen daehsaw gveng daengz gwnz mbonq bae, doiq daxboh naeuz: “Boh, cuengq sujgyaj le, mwngz daiq gou bae bozvuzgvanj ndaw sengj yawj canjlanj ba, Vangz Siujyah ban gou cungj bae yawj gvaq lo.”

Daxboh dinghdingh yawj gou yaep ndeu, yienzhaeuh gig sangj dapwngq：“Siengj bae bozvuzgvanj? Ndaej ha, daxboh daiq mwngz bae!” Gou rox, daxboh moix baez dapwngq ndaej sangjswt, baihlaeng itdingh miz aen diuzgen he. Dahraix, daxboh youh naeuz: “Mwngz geizmued gaujsi ndaej baiz youq cib mingz gaxgonq, gou itdingh hawj mwngz bae bozvuzgvanj yawj canjlanj!” Ha! Cib mingz gaxgonq? Ban gou gungh miz seiqcib ngeih boux hagseng, hawj gou mbat ndeu daj dauqgeq daih’it mingz yamq daengz cib mingz gaxgonq, yamq neix daiq hung luba?! Hoeng vihliux ndaej bae bozvuzgvanj yawj canjlanj, gou couh moeb naj gawh dang bouxbiz, daegdaengq soengset naeuz：“Ndaej ha, mbouj couh dwg cib mingz gaxgonq ma!”

Daj mwhhaenx hwnj, gou lumj bienqbaenz lingh boux vunz he nei. Youq ndaw goqdangz, gou nyinhcaen dingq lauxsae gangjgoq, mbouj caiq lumj gaxgonq yienghhaenx doeng yawj sae muengh, roxnaeuz ngaem gyaeuj guh siujdungcoz. Roengzdangz le, gou nyinhcaen guh cozyez, mbouj rox couh cam boux doengzhag hagsib ndei haenx. Moix ngoenz cuengqhag ma ranz le, gou mbouj caiq okbae guhcaemz, sij sat cozyez le, couh yawhsien yawj goqsaw ngoenz daihngeih yaek hwnj haenx. Faenh ndaemndai he, couh ndaej faenh soundaej he. Daengz geizmued gaujsi, gou gauj ndaej ndaw ban daihbet mingz. Gou angqvauvau dawz mbawdan cingzcik hawj daxboh yawj, daxboh yawj le angq dwk aenbak cungj haep mbouj ndaej. Yienghneix gou couh swngzhgei cam daxboh: “Boh, raeuz ngoenz lawz bae bozvuzgvanj yawj canjlanj ha?” Daxboh lwgda daj mbawdan cingzcik cienq daeuj yawj gou, angqvauvau naeuz:“Ngoenzriengh raeuz couh bae.” Ngoenz daihngeih banhaemh, gou ninz youq ndaw mbonq, moengj- moengj doengjdoengj dingqnyi dax- boh caeuq daxmeh gangjvah.

Daxmeh naeuz:“Mwngz caen siengj daiq Siujluz bae ndaw sengj yawj gijmaz canjlanj ha? ”

Daxboh naeuz:“Dangyienz lo, wngqcingz daeglwg couh itdingh doiqyienh.”

Daxmeh youh cam:“Gij cienz bae sengjsingz gaeuq la?”

Daxboh naeuz: “Gai duz yiengz he, wnggai gaeuq lo.”

Daxmeh youh yousim cam: “Cienz dwg gaeuq lo, hoeng mwngz lienz yienhsingz cungj caengz bae gvaq, bae sengjsingz mwngz rox loh lwi?”

Daxboh riu naeuz: “Yawj mwngz gangj neix, baihlaj aenndaeng mbouj dwg miz aen bak he ha, mbouj rox cam vunz ha!”

Ngoenz daihsam, gou caeuq daxboh naengh hwnj aen hojceh hai bae coh sengjsingz ……

Daxboh wngqcingz gij vah de gangj haenx, mboujdan son rox gou ngoenzlaeng baenzlawz guh vunz、guh saeh, hix gaijbienq ciuhvunz gou. Daj mwhhaenx hwnj, gou roengzrengz hagsib, gaenxgyaek doegsaw. Yiengh- neix gou itloh hwnj cuhcungh、gauhcungh. Doeklaeng gauj hwnj swhfan dayoz sengjsingz, bizyez le baenz boux lauxsae cunghyoz sonsaw gyauq vunz he.

(Dungj Caizluz)