Diuz dah’iq mbanjranz gou, raemx sawdikdik, yawj ndaej raen bya’iq youq ndaw raemx youz bae youz dauq. Henz dah ndaem miz haujlai gomak caeuq byaekheu. Ciengzseiz miz haujlai vunz daengz neix youz caeuq langh vaiz. Mehmbwk mbanj gou cungj gyaez daeuj henz dah saeg buhvaq caeuq swiq byaek.

Gyanghaet, gou daeujdaengz henz dah, couh yawjraen haujlai mehmbwk daeuj saeg buhvaq lo, gyoengqde itmienh saeg buhvaq itmienh doxgangj, seiz mbouj seiz fwt riuhaha, gij sing gig angqyangz, lumj aenhaw nei nauhyied raixcaix. Vunzlaux hix yien duzvaiz daeuj diegnywj henz dah langh vaiz lo. Gyoengq vunzlaux lij caeuq gyoengq mehmbwk eu fwen:“Raemxdah sawdikdik, mehmbwk saeg buhvaq; rumnywj heuswdswd, daxgoeng langh duzvaiz; buhvaq saeg hauswk, duzvaiz gwn bizbwd.”

Daengngoenz okdaeuj lo, raemx dah wenjmyagmyag. Lwgnyez daeuj henz dah ep bya, yaep ndeu couh ep ndaej geij duz bya bizbwdbwd, gyoengq lwgnyez angq dwk fwngz vad din dik, gyoengqde siengj roengz dah bae youz raemx, hoeng raen miz gaiq baiz ndeu laeb youq henz dah, gwnz baiz sij “raemxdah laeg mbouj ndaej roengz dah youzraemx”, gyoengqde cijndei dawz geij duz bya bizbwd haenx baema lo.

Seizneix, henz dah’iq byaekheu maj ndaej heuswdswd; gwnz gomak venj miz haujlai mak, diuz dah’iq neix bienq ndaej engq gyaeundei lo.

Diuz dah’iq mbanjranz gou geijlai gyaeundei ha! Diuz dah neix mboujdanh hawj dou saeg buhvaq swiq byaek, lij ndaej dwk naz rwed reih. Gou gyaez diuz dah’iq mbanj- ranz!(指导老师:韦江萍)