Youq ndaw ngoenznaengz gwn- daenj, miz haujlai vunz haujlai saeh hawj gou gamjdoengh, ceiq hawj gou gamjdoengh dwg daegnuengx dwg- gyaez ndeu.

Ngoenzhaenx, gou caeuq daxmeh cingq youq ndaw cicamh caj ci. Sawqmwh yawjraen baenz bang vunz comz baenz doi ndeu, mbouj rox fatseng gijmaz saeh lo. Gou raen gig geizgvaiq, hix caenx hwnjbae yawj nauhyied.

O, laxlawz dwg daegnuengx naj saekheu ndeu, ngunh laemx lo, gyoengqvunz youq henz gangjgangj vixvix. Daihgya cungj laihnaeuz daeg- nuengx neix aiq dwg boux vunzyaeuh ndeu, siengj hawj bouxvunz simndei bae bang de seiz ngaek vunz aeu cienz, ndigah bouxboux cij dwg youq henz yawjyawj, mbouj gamj iet fwngz bae bang. Gou sijsaeq yawjyawj, raen mbouj lumj daihgya yienghneix siengj bw. Gou nyaenx mbouj ndaej bae lumh naj de, de cungj mbouj singj. Daxmeh gou sikhaek aeu rib mehfwngz mbaengq cuengqgyang laj ndaeng de. Mbouj geij nanz, de singj gvaqdaeuj lo, de menhmenh naengh hwnjdaeuj, yawjyawj seiqhenz, youh yawjyawj dou, yienzhaeuh doiq daxmeh gangj “docih, docih”. Doeklaeng dou cij rox, daegnuengx neix dwg vunz lajmbanj, de dwg caeuq daxmeh daeuj ndaw singz yawj daxboh, daxboh de youq ndaw singz dajgoeng. Mbouj rox seizlawz, cienzbau caeuq soujgih daxmeh cungj deng caeg bae lo. Daxmeh de gig simgip, dauqcawq bae ra vunz lwnh hawj daxboh. Daegnuengx neix youh iek youh hozhawq, ndigah, couh ngunh laemx lo. Caj daxmeh de daeuj le, dou couh cuengqsim sanq bae lo.

Daxmeh gou bae cawx cibiuq seiz, raen cienzbau mbouj raen lo. “Dwg mbouj dwg cuengq youq ndaw sieng cang buhvaq ne?” Gou simgip dwk bang daxmeh fan sieng ra, hoeng, baenzlawz ra hix ra mbouj raen. Daxmeh ngeiz naeuz:“Dwg mbouj dwg haxbaenh……” Gou hujfodfod dwk naeuz: “Ndaej ha, duz fangz neix, cij geij bi lwg couh hag yaeuh vunz la, caen dwgcaengz!” Ndaw cienzbau cang miz haujlai cienz, dwg dou yaek bae lijyouz yungh, seizneix baenzlawz guh ha? Gou caeuq daxmeh simgip dwk bae cam vunz, bae ra, hoeng, cungj mbouj raen daegnuengx haenx lo. Gou heiqnietniet dwk naengh youq gwnz eij, cibfaen nanzgvaq. Cingq youq seizneix, gou raen daegnuengx haenx lo, gou sikhaek cung hwnjbae, gaemdawz lingxbuh de, rongx naeuz: “Mwngz duz yaeuh vunz neix, dawz cienzbau duh gou daeuj!” De sing iq naeuz:“Sou byaij bae seiz, gou yawjraen gwnz dieg miz aen cienzbau ndeu, couh rox dwg duh sou, gou hix cingq ra sou ne!” Gangj dwk, de daj ndaw rungj dawz ok aen cienzbau ndeu, gou dawz gvaqdaeuj baez yawj, cingq dwg aen cienzbau duh dou. Seizneix, daxmeh de hix hanh lae hanh roenx buet gvaqdaeuj, sing get naeuz:“Lwg ha, mwngz buet ndaej baenz vaiq, gou cungj gyaep mbouj hwnj lo.” Daxmeh gou doiq daxmeh daegnuengx neix naeuz:“Daiq doiq mbouj hwnj sou lo, dou loenggvaiq daeglwg mwngz lo.” Daxmeh daeg- nuengx riu naeuz:“Mbouj youqgaenj, dwg sou gouq daeglwg gou, gou docih mwngz cij dwg ne!” Gangj dwk daihgya cungj riu lo.

Dwg ha, youq lajbiengz miz baenzlai vunz simndei, cijaeu dox- saenq lai di, couh ndaej hawj aen seiqgyaiq neix engqgya gyaeundei.

（指导老师：覃红梅）