Ranz gou miz duz vaiz hung ndeu, duzvaiz neix naengnoh ndaemndat raeuzrwd, aenndang bizbwd, doiq da ndongqndat, gou moix baez yawjraen de, couh siengj hwnj baez daih’it bang de swiq ndang.

Ngoenzhaenx, gou yien duz- vaiz bae ndaw dah. Duzvaiz baez yawjraen raemx couh angqvauvau, gip ndaej yaek diuq roengz raemx bae, yienghneix, bienqbaenz duz- vaiz rag gou lo. Duzvaiz baez bongh, diuq roengz ndaw dah bae lo. Raemxdah sinz hwnj gig sang, gou cungj deng sinz dumz lo. Duzvaiz yawjyawj gou, lumjbaenz doiq gou gangj:“Doiq mbouj hwnj.” Duzvaiz rouh youq ndaw raemx, aen’gyaeuj nyeux bae nyeux dauq, mbiengj ndang ndeu fouz youq gwnz raemx, miz duzbuengx daeuj haeb de, de cungj mbouj swt, cix dwg ngauzngauz gyaeuj, baetbaet diuzrieng. Gou yawjraen miz lwed hoengz lae okdaeuj, miz di sim’in lo, couh roengz raemx bae bang de bek duzbuengx dai bae, lij gonh di raemx hwnjbae dongj dieg sieng, raen aenndang de uq lai, gou youh beng nywj daeuj cat ndang de. Duzvaiz caih gou bang de swiq ndang, di ndeu hix mbouj doengh, lij iet gyaeuj gvaqdaeuj hawj gou bang de ngvaij humz dem.

Gou lij caeuq duzvaiz guh- caemz, gou youq henz dah ciemz nywj vut roengz dah bae, duzvaiz youq ndaw dah itmienh caemx ndang itmienh gwn nywj, dou saj ndaej geijlai angq ha！

Daengngoenz doek roengz baihsae bae lo, ronghndwen venj youq henz mbwn lo, gou rag duzvaiz, it loh ciengqgo byaij bae- ma.

（指导老师：韦江萍）