Ngoenz singhgiz ndeu, daeng- ngoenz raeujrub, duzroeg youq gwnz gofaex ciengqgo. Gou sij cozyez sat le, couh angqvauvau bae ra baengzyoux ndei Siujginh bae ndaw gunghyenz dwkbej.

Daeujdaengz gunghyenz le, dou youq diegnywj naengh ndei, couh hainduj dwkbej lo. Gou ndaej ok bej gonq, gou ok 5 duz bejswnh, Siujginh sikhaek ok 3 daiq 2 at gou. Gou daegdaengq najsaep naeuz:“Va, mwngz hix miz bej daeuj gwn gou ha, gou lau lai lo.”Siujginh cingq riuhehe dwk, sawqmwh raen gou hix ok 3 daiq 2 beij de hung, da daengx lo. De vadvad fwngz gangj:“Gvaq, gvaq, gvaq.” Ciepdwk gou youh lienzlienz ok doiq, Siujginh cungj aeu mbouj ndaej, de cijndaej danq gaemz heiq ndeu. Yienghneix, bu daih’it gou hingz lo. Youh dwk bu daihngeih, gou gaijbienq dwkfap, gig yungzheih youh hingz lo. Siujginh lienz saw song bu, simgip raixcaix. Gou cix angqvauvau dwk diuq hwnjdaeuj. Siujginh mbouj fugheiq naeuz:“Mbouj saenq gou mbouj hingz, caiq dwk bu ndeu, gou itdingh hingz.”Dou youh caiq dwk bu ndeu, baezneix, gou gig mbouj yunghsim, doeklaeng Siujginh hingz lo. De angq dwk vix gou hemq hwnjdaeuj:“Gou dauqdaej hingz mwngz lo, gou dauqdaej hingz mwngz lo.” Gou raen Siujginh yienghneix sim’angq, gou gag siengj: Cijaeu mwngz sim’angq, gou hawj mwngz hingz baez ndeu youh suenq gijmaz ne?

Doeklaeng dou miz gangj miz riu dwk byaij baema lo.

（指导老师：覃珍团）