Saw hawj vunz coengmingz, saw hawj gou rox dauhleix guhvunz, hawj gou yawj ndaej gvangq yawj ndaej gyae, saw hawj gou cihsiz. Gauh’wjgih gangj gvaq:“Saw dwg mbaeklae cinbu vunzloih.” Ndigah, gou itcig dawz saw dangguh baengzyoux, gou yawj saw ciengzseiz lumz bae gwn haeux, hix lumz bae ninz. Gij goj gou caeuq saw hix riengz dwk doeg saw lai cix bienq lai.

Geiq ndaej gou hwnj sam nienzgaep hainduj hag sij cozvwnz seiz, daxmeh couh cawx haujlai saw cozvwnz hawj gou. Hawj gou daj ndaw gij saw neix ndaej daengz daezdiemj. Daj seizhaenx hwnj gou couh gyaez hwnj saw lo. Daj ndaw 《Siuj Hagseng Baujdenj》 gou roxdaengz, sij cozvwnz mbouj ndaej gapngangz ciuq sij, aeu lingzvued yinhyungh.

Miz baez ndeu, daxmeh cawx bonj 《Cozvwnz Daihcienz》 ndeu hawj gou, gou gig angq, ciep dawz saw couh buet haeuj ndaw rug bae, lumj dungxiek hozhawq ndaej gwn haeux nei doeg hwnjdaeuj. Daxmeh yaek bae guh hong, de yaek okdou seiz daengq gou: “Gwnz laeuz dak miz di haeux- yangz, danghnaeuz doekfwn, mwngz bae bang sou bw.” Seizhaenx gou yawj saw cingq yawj ndaej mizyinx, couh seizbienh han naeuz: “Gou rox lo, gou rox lo.” Daxmeh lij mbouj cuengqsim, youh naeuz: “Gaej cij goq yawj saw, geiq ndaej okdaeuj yawj mbwn bw.” Gou miz di mbouj naihfanz dwk naeuz: “Cuengqsim ba, gou rox lo.” Daxmeh okbae mbouj geij nanz, dingjlingz mbwn couh doekfwn lo, caj gou fatyienh seiz, gij haeuxyangz dak gwnz laeuz haenx gaenq deng rwed dumz lo.

Youh miz baez ndeu, daxboh cawx ndaej bonjsaw 《Seiqgyaiq Doenghduz》dauqma, gou raen le couh dawz daeuj yawj, daengz cawj haeux seizgan le, daxmeh heuh gou cawj haeux, gou gipgip muengzmuengz swiq haeux cuengq roengz gu bae le, youh bae yawj saw lo. Caj daxmeh cauj byaek ndei yaek gwn ngaiz seiz, baez hai fagu, raen haeux caengz cug, laxlawz dwg gou lumh hai dienh lo. Daxmeh miz di ndatheiq lo, naeuz gou: “Mwngz dwg baenzlawz guh ya, lienz ngaiz cungj cawj mbouj cug?” Gou lauxsaed naeuz: “Gou gaenj bae yawj saw, lumz hai dienh lo.” Daxmeh dingq gou yienghneix gangj mbouj caiq gvaiq gou lo.

Neix couh dwg gij goj gou caeuq saw, saw dwg baengzyoux ndei gou, gou hix maqmuengh daihgya dawz saw dangguh baengzyoux, hawj saw caeuq raeuz guhdoih byaij coh daengzcog.

（指导老师：韦凤玲）