Gou miz aen habbit ndeu, neix dwg mehgux gou ma gvaq cieng seiz soengq hawj gou, gou gig gyaez aen habbit neix.

Aen habbit neix fahab daih- fueng ndeiyawj, raez miz 20 lizmij, gvangq miz 10 lizmij, daenj geu buhrog saeklamz, buhrog baihgwnz miz geij aen cihmeh “disney”caeuq duz Mijlaujsuj he, gou daegbied gyaez duz Mijlaujsuj neix, de daenj geubuh saeklamz caeuq geuvaq saekndaem, gwnz gyaeuj daenj aen mauhhau, baij ok gij yienghceij gig dwggyaez. Gou lij an aen coh caenciet ndeu heuh “siujmij” hawj duz Mijlaujsuj neix.

Aen habbit gou cij miz caengz ndeu, hoeng de coux ndaej bit gig lai, coux ndaej 5 gonj bitndaem, 2 gonj bithoengz, gonj yienzbit ndeu, 4 fag cik, lijmiz gaucat dem. Gyoengqde youq ndaej gig doxndei, couh lumj bang lwgnyez ndeigyaez caez youq ityiengh.

Moix baez gou sij cozyez, gou cungj daj ndaw habbit dawz ok gonj bitndaem, nyinhcaen sij cozyez. Gou yaek veh veh seiz, gou couh dawz yienzbit daeuj veh veh. Mwh lauxsae bingz hawj gou “youh” seiz, gou hix mbouj lumz bae yawj gyoengqde, aenvih neix hix miz gij goenglauz gyoengqde ya.

Gaej yawj aen habbit gou bingzseiz coenz vah hix mbouj gangj, hoeng baez daengz seiz youqgaenj, de cix bang gou haujlai. Aen habbit neix couh lumj aen ranz ndeu, gonjbit, fagcik, gaucat cungj dwg ranz vunz ndeu, gyoengqde doxhuz guhdoh youq, bang gou sij gak cungj cozyez.

A! Habbit gou, mwngz ngoenz- ngoenz bang gou guenj ndei gij bit gou, hawj gou ndeindei sij cozyez, docih mwngz, nyienh mwngz buenx gou caez gvaq siujyoz duenh seizgan ceiq ndei neix.

（指导老师：韦凤玲）