Youq ndawsim moix boux vunz, cungj miz boux vunz yaenqsiengq gig laeg ndeu. Gou hix ityiengh, boux vunz hawj gou yaenqsiengq gig laeg haenx couh dwg boux lauxsae daih’it gou.

Mwh gou ngamq hwnj siujyoz it nienzgaep, haihag ngoenz daih’it, daxmeh daiq gou bae bauqmingz. Byaij youq gwnz loh, gou ndawsim gag siengj:“Lauxsae gou dwg bouxvunz baenzlawz yiengh ne? Dwg mbouj dwg bouxvunz gig yak gig dwglau ndeu ne……” Gou doq naemj doq byaij, mbouj rox seiz lawz daxmeh couh daiq gou daengz dangqnaj boux lauxsae mehmbwk he bae lo. Daxmeh doiq gou naeuz:“Vaiq heuh lauxsae ndei.” Gou sing iq naeuz:“Lauxsae ndei.” Lauxsae hix riunyumj naeuz:“Siuj baengzyoux ndei.” Gij sing de geijlai unqswnh, geijlai ndei dingq ha, de couh dwg lauxsae gou, gou ndawsim gig angq, nyaenx mbouj ndaej lai yawj de geij mbat. De samcib lai bi, maj ndaej mbouj sang hix mbouj daemq, aenndang reuxred, aennaj saundei youh caenciet, doiq da ronghrikrik, yawj bae gig miz cingsaenz, byoem de raezrangrang, hoeng gaenq miz di byoemhau cab youq ndaw lo. Bauqmingz ndaej le, de youh daengq gou naeuz:“Geiq ndaej ciuqseiz daeuj hagdangz bw.” Mwh de doiq gou riu, gou couh rox, de itdingh dwg boux lauxsae ndei ndeu.

Cingq dwg yienghneix, gou gig gyaez dingq de gangjgoq, dingjlingz daj it nienzgaep daengz roek nienz- gaep, cungj dwg de son dou yijvwnz. De gangjgoq seiz sing de gig ndei dingq. De sonsaw gingniemh gig lai, de bingzseiz hawj dou sij cozyez gig noix. De ciengzseiz doiq dou naeuz:“Gou mbouj iugouz sou sij geijlai cozyez, hoeng mwh sij cozyez sou itdingh nyinhcaen sij, miz seizgan sou couh lai bae yawj di sawgovai, hag lai di cihsiz. Yienghneix dou hagsib couh mbouj gamjdaengz dwgrengz, yiengh- neix hag hwnjdaeuj couh gig soengset.

Neix couh dwg boux lauxsae daih’it gou, gij yaenqsiengq de louz hawj gou haenx, gou ciengxlwenx mbouj lumz ndaej.

（指导老师：韦凤玲）