Veiz Siujhungz dwg lauzdung veijyenz ban dou, de ciengzseiz bwz song diuz mengqbyoem, lwgda de ndongqliklik, song cik fwngz de daegbied miz rengz, vih ndaw ban guh gvaq haujlai hong.

Geiq ndaej miz baez ndeu, ngamq gwn gvaq haeuxcaeux, Goh Siujvaz dungxin, gig hojyouq, nyaenx mbouj ndaej rueg lo, ndaw gyausiz sawqmwh haeusatsat, gyoengq doengzhag bouxboux nyaenj aen- ndaeng ndoj gyae’gyae bae. Lij miz di vunz naeuz: “Haeu lai lo, haeu lai lo!” Lij itmienh gangj, itmienh buet ok rog gyausiz bae. Goh Siujvaz yawjraen daihgya yienghneix, nanz- gvaq dwk daej lo.

Cingq youq seizneix, Veiz Siuj- hungz gaem aen geilabcab buet roengz laj laeuz bae lo. Gvaq yaep ndeu, de baegfofo buet dauq gyausiz, dawz namhsa saj gwnz doxgaiq rueg bae, lij aeu sauqbaet baet gij uq seuq bae. Veiz Siujhungz caen miz banhfap, gou geizheih dwk cam: “Veiz Siujhungz, mwngz caen coengmingz, mwngz dwg baenzlawz siengj daengz aeu namhsa daeuj baet gij uq ha?” Veiz Siujhungz riuriu naeuz:“Neix suenq gijmaz, dwg bingzciengz yawjraen vunzlaux yienghneix guh gvaq.” Gou youh cam: “Mwngz mbouj lau uq mbouj lau haeu ma?” Veiz Siujhungz youh riu naeuz: “Gou hix lau ha! Hoeng, danghnaeuz bouxboux cungj lau haeu lau uq, ndaw gyausiz haeuhuhu, daihgya cungj mbouj ndei souh ha. ” Gou dingq le, engq boiqfug Veiz Siujhungz lo.

Gij binjdwz Veiz Siujhungz geijlai ndei ha! Nanzdauh mbouj daeng daihgya haenh de ma?

（指导老师：覃珍团）