贵港市覃塘区蒙公乡高占小学 三（1）班 苏依玲

Daxmeh ciengzciengz son gou yaek guh boux lwgnyez lauxsaed ndeu, mbouj ndaej gangj vahgyaj. Hoeng miz haujlai baez gou raen daxmeh hix gangj “vahgyaj”.

Gou caeuq daxmeh ngoenz- naengz moix boux gwn song aen gyaeqgaeq, gou maj ndaej biz- bwtbwt, hoeng daxmeh gou lij caeuq gaxgonq ityiengh byom. Miz baez ndeu, gou guh cozyez sat le, couh bae yawj daxmeh cien gyaeqgaeq. Gyaeqgaeq cien ndaej lo, rangfwdfwd, bouxlawz raen le myaiz cungj rih bae. Gou raen cij miz song aen, couh cam daxmeh:“Daxmeh, vih gijmaz cij cien song aen?” Daxmeh riuriu gangj：“Daxmeh gaenq gwn lo.” Geiz- gvaiq, ngamqngamq hainduj cien gyaeqgaeq, daxmeh vih gijmaz gangj de gwn gvaq lone? “Daxmeh, mwngz caengz gwn, mwngz itdingh dwg yaeuh gou.” Gou sing hung gangj. “Mwngz lij iq, gwn lai di, ndang mwngz cij maj ndaej vaiq, gou gwn mbouj gwn mbouj miz gvanhaeh.”Daxmeh gangj. Yenzlaiz dwg yienghneix ha, nanzgvaiq moix baez miz gijgwn ndei gwn seiz, daxmeh cungj gangj:“Gou gwn gvaq lo, mwngz gwn ba!” Daxmeh ha, mwngz vih gijmaz swhgeij cungj sij mbouj ndaej gwn ne? Gou naemj ha naemj, mingzbeg lo: Neix dwg cungj fuengsik daxmeh gyaez lwg ndeu. Ndaeng gou baez soemj, raemxda youq ndaw gvaengzda cienqlulu.

Seizdoeng, rumz baek cihuhu, raemx caepcatcat, daxmeh vih gou swiq neix saeg haenx, song fwngz daxmeh gyaengj dwk hoengz- foedfoed lo. Gou yawjraen le, cam daxmeh gyoet mbouj gyoet, de riu gangj:“Mbouj gyoet.” Gou baenz- lawz saenq ne?

Daxmeh gangj “vahgyaj”, sawj gou gamjdoengh, hoeng ndawsim gou gig mbouj ndei souh.

（指导老师：覃珍团）