Gwn ngaiz gvaq le, ndaw ranz bouxlaux cungj ninzringz lo, gou yaemj din yaemj fwngz byaij ok dou hung, lumj bouxcaeg ityiengh siujsim. Ok dou le, gou couh lumj duz maxloeg ityiengh buet bae ra doengzdoih.

Dou buet daengz laj gofaex hung he, gofaex maj ndaej youh hung youh sang, miz geij nga hung lumj goekga dou nei, iet bae gig raez, mbaw heuswdswd. Gou goq mbouj ndaej yawj baenz lai, couh lumj duz gaenglwg nei benz hwnj faex bae gonq, gou youq gwnz faex hemq coh baihlaj:“Daihgya vaiq benz hwnjdaeuj vei!” Dahvaz song fwngz gaem maenh ganjfaex, caekhaex duiq doxroengz, song din baez di baez di benz hwnj faex. Hwnj daengz gwnz faex, daihgya gag ciemq aen dieg he gvi swhgeij.Gou naengh youh gwnz ngafaex, venj song cik ga doxroengz, rumz cifwtfwt, geijlai cwxcaih ha! Dahcej riugaekgaek mbouj dingz, Siujmeij cix boemz youq gwnz ngafaex ninzndaek lo.

“Raeuz daeuj guhcaemz ‘duz- guk daeuj lo’, ndei lwi?” Gou cam daihgya, daihgya ngaek gyaeuj doengzeiq lo. Guhcaemz “duzguk daeuj lo” dwg daihgya youq gizgyae ndoj, dingqnyi miz vunz hemq “duzguk daeuj lo” le, couh benz hwnj faex bae, seizgan daengz le, boux lawz caengz benz ndaej hwnj gofaex, bouxde couh saw lo. Dou laebdaeb diuq roengz faex, buet bae giz gyae, ndoj hwnjdaeuj. “Duzguk daeuj lo!” Boux doengzdoih sawqmwh hemq hwnjdaeuj. Dou ganjgip cienq ndang buet dauq laj gofaex.

“Vaiq di!”Gou hemq naeuz. Dahgya caenx youq laj goek faex boux ciep boux benz hwnj faex, boux beij boux vaiq, “haj﹑seiq﹑sam﹑ngeih﹑it,” boux ndeu naeuz, “seizgan daengz!” Siujhoengz menh lai, lij caengz benz hwnj faex. “Siujhoengz saw lo!” Miz song boux ngamq benz hwnj goek faex, hix suenq saw lo. Gou youq gwnz gofaex riuhehe naeuz: “Gou hingz lo” Dou cungj riu lo, sing riu cienz bae gig gyae.

(指导老师:韦江萍)