Gangj daengz densi, bouxlawz mbouj gyaez? Hoeng daxboh gou mbouj dwg itbuen gyaez, dwg gig haeujmaez ne!

“Dwk ndaej ndei, dwk ndaej ndei!”Daxboh seizneix naengh youq naj aen densi angq dwk yawj dwk giuz doxdax, gou swnh de mbouj haeujsim, couh gaem aen yauzgunggi deuz. Caengz caj gou vuenh daiz youh deng daxboh ciengj yauzgunggi gvaqbae lo, de itmienh vadfwngz itmienh naeuz:“Lwgnyez gaej luenh gauj, gvaq mbiengj ndeu bae guhcaemz.”Gangj le, de couh gyaep gou haeuj ndaw rug bae lo.

Mbouj caj daxboh naengh roengzdaeuj, gou youh laeglemx cienq dauqma ndaw dingdangz lo,lumj byajmig nei vaiqvet“caeg”aeu aen yauzgunggi, riengjret vuenh daiz. Daxboh raen densi sawqmwh deng vuenh daiz le,lienzmuengz iet fwngz vax yauz- gunggi, hoeng yauzgunggi hix mbouj raen lo, daxboh ngawz lo. Gou youq henz laeglemx riunyaen, daxboh raen gou riu, sikhaek rongx coh gou:“Mwngz ha, ngamqngamq cuengq gvaq mwngz, caen dwg sim ndei mbouj ndaej bauq ndei ha!”

Gangj sat, daxboh gaem hwnj gaiq gyaqdakbuh, siengj fad gou deuz le ndeindei yawj densi. Gou guh aen najgvaiq ndeu, yaengx fwngz vadvad yauzgunggi daeuq daxboh:“Yauzgunggi youq gizneix, gvaqdaeuj aeu vei.”Mboujliuh, fwngz gou baez vad, yauzgunggi “ba”sing ndeu doek daengz gwnz dieg, vaih lo. Gou caeuq daxboh cungj doeknaiq lo, daxboh miz heiq mbouj miz rengz dwk gangj:“Cungj gvaiq mwngz, danghnaeuz mbouj miz mwngz gaujgveij, gou couh ndaej ndeindei yawj densi lo.”

Ngoenzneix, daxboh cungj hemq mbwq lai lo. Hwhw, neix couh dwg daxboh maez densi gou.

（指导老师：覃珍团）