Ngoenzneix, hagdangz gou gawjhengz daih 29 gaiq yin- dungvei, ndawsim gou gig gikdoengh.

Gou camgya 800 mij beij buet. Cuj gou miz 4 boux doxcaez buet, gou faen daengz diuz lohbuet daihngeih. Doxdax yaek hainduj lo, lauxsae daiq dou bae daengz gwnz lohbuet, seizneix cienz daeuj gij sing gyayouz gyoengq doengz- hag, gou ndawsim diuqbubbub, Lij Fangh gaem fwngz gou vih gou gyayouz, gyoengq doengzhag hix yawj coh gou, ndaw lwgda cungj dwg gujli caeuq saenqnyaemh gou. Siujmingz caeuq Siujvaz youq henz yaek buenx gou buet. Gou seizneix cij rox gizsaed gou mbouj dwg boux dog buet, miz haujlai doengzhag、baengzyoux caeuq lauxsae buenx dwk gou, gou roengz gietsim itdingh buekmingh buet, ceng’aeu aeundaej cingzcik ndei.

Cij dingqnyi “ ba” sing ndeu, gou lumj naq ityiengh mbin okbae lo. Buet 800 mij mbouj dwg baengh vaiq, dwg baengh naihlig, ndigah ngamq hainduj mbouj ndaej sai rengz daiq lai. Gou buet daengz gien daihsam seiz, gou mbouj miz saekdi rengz lo, siengj mbouj buet lo. Mwh gou cingq yaek siengj mbouj buet, cij dingqnyi Siuj- mingz naeuz:“Gyayouz, mwngz itdingh buet ndaej hingz!” Gij sing gyayouz gyoengq doengzhag hix youq henz rwz gou hemq mbouj dingz. Gou daengx ndang youh miz rengz lo, gou buekmingh buet ha buet ha, doeklaeng buet daengz diegdaemx lo, gou hoenx hingz swhgeij lo.

Cijmiz itcig guh roengzbae, gijmaz cungj guh ndaej baenz!

（指导老师：陆雪燕）