Ngoenzneix youh dwg ngoenz- singhgiz lo, daxboh daxmeh cungj mbouj youq ranz, gou sij cozyez sat le, mbouj rox guh gijmaz saeh ndei. Seizneix, gou dwg mbouj dwg wnggai bang daxmeh guh di hongranz ne?

Gou youq ndaw ranz byaij bae byaij dauq: Wnggai guh gijmaz hong ne? Sawqmwh, conghcueng ingj haeuj lwgda gou, cij raen gwnz bohliz conghcueng miz haujlai namhfaenx. Deng, uet conghcueng ba! Hoeng, uet conghcueng mbouj yungzheih, dwg- rengz lai, gou mbouj siengj guh, fanjcingq daxmeh ngoenzlaeng itdingh uet seuq. Hoeng, gou youh siengj daengz daxboh daxmeh moix ngoenz roengzban dauqma, gaenq baeg lo, daxmeh lij yaek guh haujlai hongranz, daxboh hix guh gij hong de, itdingh gig naetnaiq, baenzlawz ndaejhoengq daeuj uet conghcueng ne? Seizneix gou gaenq majhung lo, wnggai bang bohmeh guh di hongranz lo. Siengj daengz gizneix, gou gietdingh uet conghcueng lo.

Gou sien ra baengzuet、sij- gezcingh caeuq bauqceij daeuj, caiq daek doengj raemxsaw ndeu, yiengh- neix couh hainduj uet lo.

Gou yawjyawj gij namhfaenx gwnz bohliz, gag siengj: Gij namhfaenx neix, yungh baengz uet aiq mbouj yungzheih uet ndaej seuq, yungh gijmaz uet ndei ne? Gou sawqmwh yawjraen gwnz ciengz venj miz gaiq sauqbaet bwngaeq ndeu, vihmaz mbouj yungh sauqbaet bwngaeq daeuj baet namhfaenx ne? Gangj guh couh guh, gou song fwngz gaem ndaet sauqbaet bwngaeq, menhmenh baet faenx gwnz bohliz, caen daihraix, namhfaenx foenfoen doek roengzdaeuj lo, ciepdwk, gou dawz sijgezcingh cuengq roengz ndaw raemx bae, yienzhaeuh dawz baengzuet cimq dumz le, caiq niuj hawq, daj gwnz uet doxroengz, gou siengj, yienghneix uet itdingh uet ndaej seuq. Hoeng, gou baez yawj, namhfaenx yienznaeuz uet seuq lo, hoeng, gwnz bohliz lij miz haujlai raemx. Gou ganjgip aeu bauqceij daeuj bu youq gwnz bohliz. Gvaq yaep he, gou dawz bauqceij biengj roengzdaeuj, gwnz bohliz mbouj miz raemx lo, gou soeng le gaemz heiq he. Sawqmwh, gou raen gwnz bohliz lij miz diemj raizdiemj ndeu, ngamq siengj yungh fwngz bae cat, youh siengj, fanjcingq cij dwg diemj raizdiemj ndeu, youh mbouj yienh da, mbouj uet hix ndaej lo. Seizneix, gou youh siengj hwnj gij vah daxmeh: Guh gijmaz saeh cungj yaek miz naihsim, nyinhcaen guh, mbouj ndaej miz saek di lujlaj. Dwg ha, gij vah daxmeh gangj ndaej deng. Yienghneix, gou couh yungh fwngz bae gvet raizdiemj, caiq yungh baengzuet uet baez ndeu, bohliz dauqdaej uet ndaej seuq lo. Gou yawjyawj gij bohliz conghcueng gou uet ndaej seuqsatsat haenx, angq dwk riu lo.

Seizneix, daxmeh roengzban dauqma lo. De yawjraen bohliz conghcueng uet ndaej ronghsag seuqsat, angq dwk gangj:“Lwg gou majhung lo, hix roxsoq lo, rox bang daxmeh guh hongranz lo, caen ak ha.” Gou dingq le, ndawsim lumj gwn dangz nei diemzsisi.

(指导老师：韦丽平)