Ndwen 3 ngoenz 24 banringzgvaq, Namzningz Si Liengzging Gih Nanzyauj Cin Cunghsinhyau youq ndaw hag haibanh gaiq daih’it ciet vwnzva fungsug “sam nyied sam”. Dangx hagdangz lauxsae hagseng caeuq dingzlai bohranz mehranz camgya le hozdung.

Baez ciet vwnzva hozdung neix, gyoengq lauxsae hagseng angqangq yangzyangz, biujyienj le《Fwen Vwnzmingz Laexngeih》、《Fwen Ngeihcib Seiq Cietheiq》、《Cingz Rim Haeuxnaengj Haj Saek》daengj gij cezmuz eu fwen diuq foux aeu Vahcuengh daeuj bien baiz haenx. Vwnzyi biujyienj sat le, daengxgyoengq lauxsae hagseng caeuq bohranz mehranz cungj cimzgwn le gij haeuxnaengj haj saek rangfwdfwd haenx. Doengzseiz, hagdangz lij hawj gyoengq hagseng guh le bau aendomq、haizgieg sam vunz byaij vaiq biujyienj、fouxfaexsaux daengj dijyuz hozdung miz daegsaek Bouxcuengh neix.

Baez hozdung neix ndaej swnjcienz gij vwnzva conzdungj Bouxcuengh gig miz yiyi, ndaej sawj gyoengq hagseng lai rox cihsiz, sawj gyoengqde roxnyinh conzdungj vwnzva Bouxcuengh miz yinxdaeuz, gikfat gyoengqde bae gyaezhoh gij vwnzva conzdungj maenhndei Bouxcuengh raeuz!(Luz Bingz/陆 萍)