3 nyied 25 hauh banhaet, youq Gvangjsih Swhfan Yozyen Cuhdwngj Gyauyuz Yozyen 2016 gaep ban Cuengh Gun song vah 160 lai boux hagseng, bae daengz Namzningz Si Vujmingz Gih Gingloz Siujyoz camgya“sam nyied sam Bouxcuengh”hawfwen nem ciet lijyouz vwnzva Loegvet hozdung.

Hozdung youq ndaw singfwen Boux- cuengh ndeidingq haenx haimuq lo. Gyoengq doengzhag angqyangz yawjhaenh gij vwnzyi hozdung biujyienj ndeiyawj, caiqlij camgya diuq fouxfaexsaux、dwkdomq、dwkgyangq doenghgij vwnz dij hozdung miz daegsaek Bouxcuengh naekgywg neix. Baez hozdung neix mboujdan youq biujyienj fuengmienh hawj gyoengq doengzhag gamjsouh daengz gij vwnzva Bouxcuengh ndei, caiqlix hix youq mwh cimz gak cungj gijgwn ndei conzdungj, ndaej daengz gij yiengjsouh gig daegbied mbouj ityiengh.

Mbat hozdung neix dwg Gvangjsih Swhyen Cuhdwngj Gyauyuz Yozyen Siujyoz Gyauyuz Conhyez (Cuengh Gun song vah fuengyiengq) sonhag saedguh hozdung ndawde yiengh ndeu, dwg vihliux fungfouq gij hagdangz vwnzva swnghhoz gyoengq hagseng, hawj gyoengq doengzhag youq mwh saedguh rox daengz Bouxcuengh vwnzva gig mizyinx, gyalai roxnyinh minzcuz raeuz miznaj, yungh saedguh bae coicaenh hagsib ciennieb cihsiz.

(Vei Munggiz/韦梦琦 sij Vangz Ginh- yinh/黄金鑫 ingj)