Daxmeh gou mbouj sang mbouj daemq，louz byoem raez, lwgda gig miz saenz, bingzseiz raen vunz cungj dwg naj riunyumj. Daxmeh doiq gou iugouz gig yiemz, raen gou caengz guh cozyez sat couh bae guhcaemz seiz, aennaj de sikhaek “youz gvengq bienq raemh”, gou couh ganjgip bae sij cozyez. Yawjraen gou cozyez sij ndaej haemq ndei seiz, de cungj dwg haenh gou.

Miz baez ndeu, gou cuengqhag ma ranz, caengz sij cozyez couh bae nyam dennauj lo. Daxmeh baez ma daengz ranz, couh cam gou guh cozyez sat caengz? Gou gangj guh sat lo, youh laebdaeb nyam dennauj. Byawz rox daxmeh heuh gou dawz cozyez okdaeuj hawj de genjcaz, seizde gou mbouj rox baenzlawz guh cij ndei. Daxmeh raen gij yienghceij gou, gijmaz cungj rox lo. De heuh gou daengz henz ndang naeuz:“Yiz Bingh, mwngz seizneix yinvu cujyau dwg hagsib, sien sij cozyez sat caiq bae guh gijwnq.” Gou ganjgip bae sij cozyez, lujluj lajlaj sij mbat ndeu, youh bae nyam dennauj lo. Byawz rox daxmeh laeglemx yawj cozyez gou le naeuz:“Mwngz gvaqdaeuj, lingh sij!” Gou gig mbouj cingznyienh, hoeng daxmeh itcig heuh gou lingh sij gvaq. Gvaq le yaep he, daxmeh byaij gvaqdaeuj, yawjraen gij cih gou beij yienzlaiz sij ndei haujlai, angq dwk naeuz:“Mwngz nyinhcaen hwnjdaeuj, couh sij ndaej gig ndei ha!”Gou dingq le ndawsim angq raixcaix.

Neix couh dwg daxmeh gou, boux daxmeh gvansim gou、yiemz iugouz gou ndeu!

(指导老师：陆雪燕)