Ngoenzsinghgiz, gou gwn ngaiz le youq gyanghongh guhcaemz, yawjraen gwnz gaiq dieghoengq liz ranz gou mbouj gyae haenx miz duz vaizmeh caeuq duz vaizlwg he. Duz vaizmeh daengx ndang ndaemmong, aen- dungx bongqbwdbwd lumj aengyong nei. Doiq gaeu de youh goz youh hung. Duz vaizlwg henz ndang bwn de beij vaizmeh mong, yawj hwnjbae raeuzredred, cingq baet diuzrieng raezrang de, ngaem gyaeuj gwn nyangj diemzsisi. Gou sawqmwh siengj hwnj gou raen daxgoeng gwih vaiz gvaq, roxnyinh gig mizyinx, ngoenzneix gou hix gwih duz vaizlwg sawqsawq. Siengj daengz gizneix, gou couh yaeng’yaeng byaij bae coh duz vaizlwg.

Dauqdaej dwg vaizlwg, gou bae daengz henz ndang de, de yiengq gou hemq “mo mo mo” geij sing le, youh dauq ngaem gyaeuj gwn nyangj. Gou miz di lau, lau de yungh gaeu daeuj daemj gou, gou sikhaek dingz roengzdaeuj. Gvaq yaep he, de youh ngiengx gyaeuj hwnjdaeuj yawj gou, lij aeu linx daeuj riz gou. Gou baez mbeihung, couh aeu fwngz lumhlumh aenndang de , de di ndeu hix mbouj doengh, gou couh benz hwnj gwnz ndang de, menhmenh naengh ndei.

Duz vaizlwg baez doeksaet, sikhaek diuq hwnjdaeuj, siengj dawz gou daj gwnz ndang de bau roengzdaeuj. Seizneix, gou ndawsim youh angq youh vueng, song gaiq ga geb ndaet ndang vaizlwg, song gaiq fwngz gaem maenh diuzcag caeuq bwnndang de, mboujlwnh de baenzlawz cak, gou cungj mbouj cuengq fwngz. Gvaq yaep he, vaizlwg raen gou mbouj dwg moeb de, couh menhmenh dingh roengzdaeuj lo, doz gou cienq bae cienq dauq.

Gwih youq gwnz ndang vaizlwg, gou lumj gwih youq gwnz ndang duzmax, lumj boux ciengginh nei, daekeiq raixcaix.

（指导老师：陆小媚）