Miz ngoenz singhgiz ndeu, gou sij cozyez sat le, couh angqvauvau buet okbae guhcaemz lo.

Ngamq buet ok bakdou, couh dingqnyi sing yiengj “sa sa sa”. Gou baez yawj, yienzlaiz dwg dah niq miz cib bi baedauq ndeu, cingq yungh song fwngz youq ndaw nyapnyaj henz loh gip nyapnyaj. Dah niq neix daenj geu buh youh vaih youh uq ndeu, gwnz din daenj doiq haiznaeng vaih ndeu youh hung youh raez, di ndeu hix mbouj hab din. Raek aen daehndaij ndeu, raen gij huqfeiq ndaw nyapnyaj ndaej dawz bae gai haenx, couh cuengq haeuj daeh bae. Sawqmwh, de raen youq geh nyapnyaj miz bonj saw ndeu, couh menhmenh gip hwnjdaeuj, yungh fwngz menhmenh uet seuq bae, lauheiq dawz saw loengh vaih. Doek- laeng, de couh maeuq roengzdaeuj, nyinhcaen bienj bonjsaw yawj. De yawj ndaej gig haeujmaez, lienz gou byaij daengz baihlaeng de, de cungj mbouj rox. Gou yawj bonjsaw ndaw fwngz de, anj lo: Bonj saw neix mbouj dwg haemhlwenz gou ngamq vut ma? Seizneix de roxnyinh daengz baihlaeng miz vunz lo, gipmuengz dawz saw haep hwnjdaeuj, cienq ndang gvaqdaeuj laulili dwk yawj gou. Gvaq yaep he, de menhmenh daj ndaw daehbuh dawz gaiq sujbaq ndeu okdaeuj, siujsim dwk dawz saw bau ndei, riuj aendaeh coux huqfeiq yaek byaij bae. “Caj yaep he!” Gou sawqmwh miz aen siengjfap ndeu, ganjgip buet haeuj ranz bae, daj gwnz gyaqsaw aeu bonj saw 《Seiqgyaiq Gojlwgnyez》gou yo haujlai nanz haenx, byaij daengz baihnaj de, gangj：“Dahnuengx, bonj saw neix soengq hawj mwngz!” De yawjyawj bonjsaw, youh ngiengx gyaeuj yawjyawj gou, raemxda youq ndaw lwgda cienqlulu. Dahniq song fwngz ciep dawz bonjsaw, byaij bae lo.

Gou dinghdingh ndwn dwk, yawj de yied bae yied gyae lo, raemxda gou nyaenx mbouj ndaej lae roengzdaeuj lo. Gou dauqngeix hwnj lauxsae ciengzciengz gangj, raeuz dwg dujva guekcoj, nanzdauh dahniq neix mbouj dwg ha? Vih gijmaz de mbouj bae hwnjhag? Dwg aenvih ranz de mbouj miz ngaenz ma? Hoeng, seizneix raeuz miz haujlai vunz cungj gwn ndei daenj ndei, ok dou lij miz giuzci naengh, nanzdauh raeuz couh yawjngoeng- ngoeng dahniq neix baenzngoenz gip nyapnyaj gvaq ndwenngoenz ha?

Raeuz daihgya fwngz gaem fwngz, caezsim roengzrengz, caez daeuj bang dah niq neix, daeuj bang gij lwgnyez lij mbouj ndaej doegsaw haenx, sawj gyoengqde caeuq raeuz itheij hwnjhag, itheij guhcaemz, angqangq yangzyangz gvaq ndwen- ngoenz.

（指导老师：韦丽平）