Miz ngoenz ndeu, daxboh caeuq daxmeh cungj bae guh hong lo, gou yawjraen gyaeujcongz miz gij buhvaq daxboh caeuq daxmeh vuenh roengzdaeuj haenx, gou siengj: Fanjcingq seizneix mbouj miz saeh guh, couh bang daxboh daxmeh saeg buh ba. Bohmeh dauqma gangj mbouj dingh lij haenh gou ne.

Hoeng, gou caengz saeg gvaq buhvaq. Gou couh yungh aen bat coux aeu raemx, caiq dawz buhvaq cuengq roengz ndaw bat bae, yienzhaeuh aeu sijyihfwnj daeuj, aenvih daet aen bakdaeh daiq hung, sijyihfwnj raix ok lai lo, gou siengj gip hwnjdaeuj cuengq roengz ndaw daeh bae, hoeng sijyihfwnj youq ndaw raemx menhmenh yungz lo, dawz mbouj hwnj lo. Ndaw raemx mauh ok haujlai fugfauz, caemhcaiq yied mauh yied lai. Sawqmwh gou siengj hwnj miz vunz gangj gvaq, sijyihfwnj dwk lai le, buhvaq aiq deng cimq vaih, gou lienzmuengz dawz raemx ndaw bat raix okdaeuj di, caiq gya raemx. Gou yawjraen ndaw bat vanzlij miz haujlai fugfauz, caiq raix raemx, gya daihsam baez raemx, gij fugfauz ndaw bat cix bienq noix di.

Gaendwk, gou yungh rengz fou buh, fou dwk fwngz cungj hoengz lo, caiq yungh din caij, itcig saeg daengz mbouj miz fugfauz. Hoeng gou riuj geubuh hwnjdaeuj baez yawj, hozbuh caeuq bakgen vanzlij uq. Gou geiq ndaej daxmeh bingzseiz saeg buh seiz, youq song giz neix lai cuengq di sijyihfwnj bw, gou couh ciuq gij fuengfap daxmeh youq hozbuh caeuq bakgen lai dwk di sijyihfwnj, caiq fou geij mbat, yungh raemx sauz baez yawj, ya, caen seuq ha. Mbat neix gou angq raixcaix, baez geu baez geu yienghneix saeg, mbouj geij nanz couh dawz buh saeg sat lo, niuj raemx bae le, dak youq gwnz saux.

Gou cingq dak buh seiz, daxmeh guh hong dauqma lo, yawj- raen gij buh dak youq gwnz saux, daxmeh riu lo, gou hix daekeiq dwk riu lo. Daxmeh naeuz:“Mwngz yawj mwngz dawz geuvaq mwngz loengh dumz lo.” Gou ngaem gyaeuj baez yawj, caen dahraix, buhvaq gwnz ndang gou ca mbouj geijlai cungj dumz lo. Daxmeh youh naeuz: “Vaiq vuenh roengzdaeuj, gou bang mwngz saeg.” Gou ngiengx gyaeuj naeuz: “Hw! Gou gag saeg.”

（指导老师：庾书扬）