“Ap ap ap ……” Gyanghaet, duzbit iet hoz coh gwnz mbwn hemq, lumj naeuz heuh bouxcawj daeuj gueng de ityiengh. Duzgaeq daj ndaw cek riengjret diuq okdaeuj, hix “o o o……” hemq mbouj dingz, lumjbaenz caeuq duzbit beij, yawj- yawj boux lawz sing engq hung di.

Song duzde, daj bouxcawj cawx dauqma daengz seizneix couh mbouj doxndei gvaq, itcig mwngz nap gou, gou dot mwngz. Doeklaeng song mbiengj cungj sieng lo. Duzgaeq cingq siengj iet hoz yungh aen baksoem de bae dot duzbit, byawz rox bouxcawj iq dawz gijgwn daeuj gueng gyoengqde lo. Hoeng baezneix bouxcawj iq mbouj dwg sikhaek daek gijgwn hawj gyoengqde, cix dwg aenbak nam mbouj dingz:“Fouqgiengz、 minz- cuj、vwnzmingz……” Song duzde miz di hozndat lo, sikhaek bek fwed iet hoz sing hung hemq hwnjdaeuj. Bouxcawj raen le, hix mbouj gip, sing iq naeuz: “Rox sou iek lo, hoeng gij sevei cujyi gyacizgvanh gou hix yaek boih ndaej cij ndaej ha……” Yawjraen yienghneix, duzbit doiq duzgaeq gangj:“Gaeq daegnuengx, yawjdaeuj raeuz lijdwg doxndei ba, mboujne, bouxcawj cungj mbouj hawj raeuz gwn bw.” Duzgaeq raen bit daeggo baenzneix gangj, hix ngaekngaek gyaeuj doengzeiq gij siengjfap duzbit lo.

Bouxcawj iq moix baez daeuj gueng duzgaeq caeuq duzbit cungj bungz daengz song de doxhoenx mbouj dingz, seizneix raen song de sawqmwh caemrwg dwk caj gwn, geizheih dangqmaz. De itcig boih sevei cujyi gyacizgvanh:“Fouq- giengz、minzcuj、vwnzmingz……” Bouxcawj iq raen duzbit caiqhix mbouj ceng lo, sikhaek angqyangz dwk daek gijgwn hawj gyoengqde. Duzgaeq caeuq duzbit sikhaek buet gvaqdaeuj angqyangz dwk gwn- yabyab.

Duzgaeq caeuq duzbit gwn imq le, duzbit iet hoz raezrangrang cam duzgaeq: “Gijmaz dwg sevei cujyi gyacizgvanh ne?” Duzgaeq hix mbouj rox naeuz:“Haxbaenh raen de gangj ‘doxhuz’ ‘bingzdaengj’, aiq dwg heuh gyoengq doenghduz raeuz hix aeu doxgyaez ba?” Daj baezneix hwnj, duzgaeq caeuq duzbit mbouj caiq doxnap doxdot lo. Moix baez raen bouxcawj iq boih sevei cujyi gyacizgvanh seiz, hix riengz dwk sing hung hemq “ap ap ap……o o o……” Gij sing neix baenz souj go ndei dingq ndeu.

(指导老师：陆冬群)