Haujlai saeh cungj riengz seizgan lae bae lo, hoeng, miz gienh saeh ndeu hawj gou gig nanzlumz, daengz seizneix gou lij geiq ndaej cingcing cujcuj.

Geiq ndaej youq bi’gvaq hanz- gyaj ngoenz singhgiz seiq ndeu, gou bae ranz daxdaiq guhcaemz, ngamq haeuj bakdou couh yawjraen miz bang gaeqlwg dwggyaez、bwnyupyup ndeu cingq humx youq henz ndang gaeqmeh “gigigi” hemq mbouj dingz, youq gyoengq gaeqlwg baihndaw miz duz ndeu gou ceiq gyaez, duzde daengx ndang bwn henjrwg, baihgwnz lij miz geij diemj raizndaem, dwggyaez raixcaix. Gou caen siengj umj de youq ndaw rungj. Vihliux gaeb ndaej dawz duzde, gou laeglaemx riengz youq baihlaeng gaeqmeh. Sawqmwh, gou raen miz aen gihvei gig ndei ndeu——Duzde riengz youq henz ndang gaeqmeh caeuq gyoengq gaeqlwg buet bae buet dauq, mbouj siujsim deng gaz youq ndaw geh rin, buet mbouj ndaej lo. Gou couh sikhaek buet gvaqbae, dawz duz gaeqlwg dwggyaez haenx bungj okdaeuj, aeu fwngz menhmenh rub gij bwn unqnupnup de. Gou cingq yaek dawz gaeqlwg umj baema guhcaemz seiz, gaeqmeh sawqmwh raen miz duz gaeqlwg ndeu mbouj raen lo, dauqcawq bae ra. Raen gou umj gaeqlwg yaek byaij deuz, gaeqmeh sikhaek aj doiq fwed de vaiqvet coemj coh gou, gaeqmeh lumjbaenz gig ndatheiq, ndaw bak fat ok gij sing “gugugu”, lumjbaenz gangj naeuz: “Vaiq boiz lwg gou hawj gou! ” Gaxgonq, duz gaeqmeh neix cungj dwg raen vunz couh buetdeuz, seizneix cix mbouj lau vunz. Gou miz di geizheih, couh gaem nyeuq rin iq ndeu vut coh gaeqmeh, hoeng, gaeqmeh cix itcig coemj coh gou. Gou miz di lau lo, hoeng youh gag siengj: Gou dwg bouxvunz, de dwg duzgaeq, gou cix mbouj lau de ne. Baez siengj daengz gizneix, gou youh gaem dawz geij nyeuq rin vut coh gaeqmeh, cingqndei vut deng doiq fwed gaeqmeh, miz geij diemj lwed daj ndaw fwed de ndik roengzdaeuj, hoeng duz gaeqmeh cix mbouj goq gij sieng de, mboujdan mbouj dingz roengzdaeuj, dauqfanj engq vaiq coemj gvaqdaeuj. Sawqmwh gaeqmeh diuq hwnjdaeuj, yungh doiqfwed sieng de haenqrengz bek gou, aeu aenbak soemsetset de yunghrengz dot gou, fwngz gou deng dot ok lwed lo, in raixcaix. Gou yawjraen neix, fwngz saenzdwddwd dwk gvaigvai dawz gaeqlwg cuengq roengzdaeuj, gaeqmeh yawjraen gaeqlwg mbouj miz maz saeh, couh mbouj caiq dot gou, daiq gaeqlwg buetdeuz lo.

Duz gaeqmeh bienq ndaej mbeilaux, maenh’ak, aenvih de dwg daxmeh gaeqlwg. Daj haenx hwnj gou mbouj gamj caiq gaeb gaeqlwg de lo.

Gienh saeh neix gvaqbae haujlai nanz lo, hoeng gou ciengzseiz siengj hwnj duz gaeqmeh haenx, siengj hwnj gaeqmeh baenzhaenx gyaez lwg de.

（指导老师：陆小媚）