Mwngz yawj, youq rog bakdou byaij daeuj boux lwgsai ndeu，doiq da de youh hung youh ndaem, giuzndaeng sohswdswd, bak hung raixcaix. Ceiq yinx vunz haeujsim haenx dwg aen’gyaeuj hung de, lumj aen- giuz hung nei, ndaw uk de cungj cang rim cihsiz. De ha, couh dwg doengzhag gou —— Couh Cwng , vunz heuh “siujbozsw”.

Couh Cwng gig gaenx hagsib, baez miz seizgan couh yawj saw, doeg saw lai hawj de ndaejdaengz hoizbauq, cozvwnz de sij ndaej gig ndei, hagsib cingzcik hix ndei dangqmaz, miz seiz lienz gou boux banhcangj gig okmingz neix hix fug saw lo. De daegbied gyaez gij saw mizgven daswyenz haenx, ndigah doiq doenghduz doenghgo fueng- mienh neiyungz neix gig sug.

Miz baez he, duzmoed raih hwnj gwnz daiz gou daeuj, gou dinghdingh yawj de. De siujsim sisi dwk raih, gvaq yaep he , de raih daengz gwnz fwngz gou, loengh ndaej fwngz gou humznywdnywd. Gou baez fid fwngz, duzmoed deng fid daengz gwnz dieg bae lo. Gou maeuq roengzbae yawj, moed iq cak le yaep he, boeg ndang gvaqdaeuj, youh raih baefidfid. Gou yienghlawz hix siengj mbouj doeng: Duzmoed iqetet ndeu, daj “bangxdat” sangngaungau doek roengz- daeuj, gingqyienz mbouj dai, nanzdauh de miz fapswd “dai le dauq lix”? Gou daiq aen ngeizvaeg neix bae cam Couh Cwng. De dingq le, riuhaha, miz diuz miz leix dwk lwnh gou :“Ndangdaej duzmoed gig mbaeu, mboujlwnh daj gij dieg geijlai sang doek roengzdaeuj, cungj mbouj dai, couh lumj mbawfaex daj gwnz gofaex mbin roengz- daeuj cix mbouj vaih saekdi ityiengh …… ”Couh Cwng vanzlij caeuq gou gangj le haujlai cihsiz mizgven duzmoed, gou dingq ndaej gig haeujmaez, gou boiqfug de raixcaix .

Dingq gou gaisau le, mwngz dwg mbouj dwg hix gyaez hwnj boux doengzhag gou gaenx hagsib neix ne?

(指导老师：庾书扬)