Ranz gou ciengx miz duz vaiz he. Duzvaiz ranz gou aenndang sangngaungau, lumj duzciengh ityiengh hungsang, seiq ga maenghmbwt, aendungx baez gwn imq le, couh lumj aen- gyong nei, gij sing heuh de youq gig gyae cungj dingq ndaej nyi, song diuz gaeu youh hung youh raez. Dingq daxgoeng gangj duzvaiz neix gaenq ndaej roek bi lo.

Duzvaiz ranz gou, yienz- naeuz gig hungsang, hoeng de mbouj gyaez caeuq gij vaiz wnq doxdaemj. Miz baez ndeu, gou caeuq daxgoeng naengh youq gwnz civaiz bae ndoi guh hong, youq buenq loh bungz daengz duzvaiz ak ndeu daj gizgyae cunghuhu gvaqdaeuj, duzvaiz ranz gou sikhaek rag ci bienq gvaq giz wnq bae, mboujne, gou caeuq daxgoeng haengjdingh deng doek roengz ci lo.

Gou ceiq gyaez duzvaiz couh dwg de lumjbaenz dingq rox gij vah bouxvunz nei! Geiq ndaej sujgyaj miz ngoenz ndeu, mbwn gig hwngq, gyoengqdou bae sou haeuxyangz, cang le ci haeux- yangz rim he. Ngoenz haenx cingqngamj daxboh mbouj youq ranz, daxmeh couh heuh gou caeuq de dawz aen ekci cang ndei bae. Duzvaiz lumjbaenz dingq rox vah dou nei, sawqmwh ngaem gyaeuj dawz song gaiq gaeu con haeuj ndaw ekci bae, gyoengqdou di rengz cungj mbouj yungh, rag dawz diuz cag riengz civaiz byaij ma ranz lo. Daxmeh mbouj dingz haenh naeuz: “Duz vaiz neix caen dwg duz bangfwngz ndei he ha,gvaqlaeng yaek ciengx de biz- bwdbwd bae, hawj de vih ranz raeuz guh lai di hong. ”

Gangj daengz duzvaiz ranz gou, lij miz gienh saeh ndeu, engq hawj gou gamjdaengz gig ak. Miz ngoenz ndeu, ranz gou mbouj miz saek boux vunz youq ranz, duzvaiz lamh youq gyanghongh. Dou dauqma dingq daxbuz ranznden gangj:“Dax- baenh miz boux vunzseng ndeu daeuj gej cagvaiz, aiq dwg siengj caeg vaiz, byawz rox duzvaiz ranz gou cix daemj boux caeg neix, bouxcaeg deng hwk dwk buet- deuz lo.” Dou baez yawj, caen dahraix lo, diuzcag deng fagmid gvej goenq lo, duzvaiz hix miz di sieng lo.

Gou gyaez duzvaiz ranz gou, aenvih de dwg baengz- youx gou.

（指导老师：陆冬群）