贵港市覃塘区蒙公乡

凌寺小学四（2）班 韦嘉能

Gou majhung daengz seizneix, fatseng gvaq haujlai haujlai gienh saeh, hoeng miz gienh saeh ndeu, ciengzciengz yienh youq naj da gou, lumj ngamq fatseng nei.

Miz ngoenz ndeu, ban gou hwnj goq yijvwnz, gyoengq doengzhag cungj byaij haeuj gyausiz, naengh youq diegnaengh swhgeij, caj lauxsae daeuj hwnjdangz. Mbouj geij nanz, lauxsae byaij haeuj gyausiz, hainduj gangj goq lo, gyoengq doengzhag bouxboux cungj nyinhcaen dingq lauxsae gangj goq, gou hix nyinhcaen dingq.

Sawqmwh, gou dingq nyi miz vunz heuh gou, gou nyeux gyaeuj yawj coh laeng, laxlawz dwg Siujmingz cam gou ciq gangbit, gou couh daj ndaw habbit dawz bit ciq hawj de. “Siujnaengz, cingj mwngz hoizdap aen vwndiz gou ngamq gangj haenx.” Lauxsae gig yiemz dwk yawj gou. Gou di ndeu cungj mbouj rox hoizdap, gyoengq doengzhag cungj riu gou, gou naj fwt hoengz, gig siengj daej, hoeng gou youh nyaenx youq lo. Lauxsae gangj vah gou coenz ndeu hix dingq mbouj nyi. Gou vih gijmaz ciq gangbit hawj de ne? Vih gijmaz mbouj nyinhcaen dingq lauxsae gangj goq ne? Gou siengj bae siengj dauq, nanzdauh gou loek lo, neix mbouj dwg bang bouxwnq ma?

Gou gig nanzlumz gienh saeh mbouj wnggai fatseng youq ndaw goqdangz neix.

(指导老师：覃福奇)