Yenz lauxsae raen song boux doengzhag doeg sat cozvwnz, couh naeuz: “Baihlaj cingj daihgya daeuj gangjgangj, dingq cozvwnz Dangz Dahaij le, daihgya nyinhnaeuz Yenz lauxsae cigndaej gingqboiq haenx cingj yaengx fwngz.” Dangz Dahaij raen cijmiz geij boux doengzhag yaengx fwngz, de gag siengj:“Yenz lauxsae seizneix lij son raeuz, bingz- seiz youh doiq raeuz baenzneix ndei, gij doengzhag haenx lij nyinhnaeuz de mbouj cigndaej gingqboiq, caen mbouj miz liengzsim. Hoeng de youh raen, gij doengzhag nyinhnaeuz Lij lauxsae cigndaej gingqboiq haenx cimq daengx ban doengzhag vunzsoq dingzlai. Yenz lauxsae riunyumj dwk ngaek gyaeuj, naeuz:“Gij siengjfap gou hix caeuq daihgya ityiengh, nyinhnaeuz Lij lauxsae engq cigndaej daihgya gingqboiq.”

Dangz Dahaij baez dingq, gyoengq doengzhag caeuq lauxsae cungj fanjdoiq swhgeij, lumjbaenz swhgeij bungjbauq Yenz lauxsae nei, gamjdaengz gig vi, “dwng” dwk ndwn hwnjdaeuj, raemxda youq ndaw gvaenghda nding’yan aeng dwk, de gikdoengh dwk naeuz: “Yenz lauxsae doiq raeuz baenzneix ndei, vih gijmaz mbouj cigndaej daihgya gingqboiq?” Song coij raemxda menhmenh daj gemjnaj lae roengzdaeuj, Dangz Dahaij yungh laengfwngz uet raemxda, daejsaekwk dwk naeuz:“Bingzseiz, Yenz lauxsae daih raeuz lumj lwg caenseng ityiengh, daihgya cungj rox bw. Miz gienh saeh he sawj gou gig nanzlumz. Haggeiz gonq, gou vihliux loengh Liuz Yenz boux gveijmaj neix, hai aendou gyausiz diuz luengq he, cuengq aenndoengj youq gwnz begdou, siengj hawj Liuz Yenz mwh hai dou haeuj gyausiz, aenndoengj doek roengz camj youq gwnz gyaeuj de. Hoeng Yenz lauxsae miz saeh daeujdaengz gyausiz, aenndoengj gwnz begdou doek roengzdaeuj, cingqndei doek daengz najbyak Yenz lauxsae. Sawqmwh, najbyak oklwed swnh gemjnaj ndik daengz gwnz dieg lo.

“Ngoenz haenx cuengqhag le, gou mbouj gamj ma ranz, mbwn youh doek fwn hung, gou boux dog youq ndaw gai youzlangh, mbouj rox baenzlawz guh cij ndei. Mbwn laep lo, daxboh daxmeh raen gou cungj caengz ma ranz, couh dwk dienhvah cam Yenz lauxsae. Yenz lauxsae baez dingq gip lo, mbouj goq baksieng swhgeij, gaemdawz aenliengj couh buet ok ranz bae. Ra raen gou le, daxboh daxmeh cij rox gij saeh fatseng haenx, daxboh daxmeh ndaq dwk gou, hoeng Yenz lauxsae cij dwg yungh fwngz lumhlumh aen’gyaeuj gou, coenz vah gvaiq gou he cungj mbouj gangj.

“Deng fwn rwed le, gou fatndat bingh lo. Yenz lauxsae ngoenzngoenz mbouj lau loh gyae daeuj yawj gou, lij bang gou bouj goq, de mbouj dwen gvaq gienh saeh aenndoengj saek baez.

“Yenz lauxsae baenzneix dungx- gvangq, sim baenzneix swnhsienh, nanzdauh mbouj cigndaej raeuz gingqboiq ha?”

“Bababa……” Ndaw gyausiz yiengj hwnj sing bekfwngz nanznanz cungj mbouj dingz.

(5)