Namzningz Diuqfoux 《Ciengq Denhyauz》 Ndaej Gaiq Daihcibhaj

Daengx Guek Bouxcoz Nyezrauh Conhyez Diuqfoux Doxdax Gimciengj

Mboengqneix, Namzningz Si Sinhhingh Minzcuz Hagdangz cienz daeuj siusik ndei! Diuqfoux 《Ciengq Denhyauz》 gag caux aen hagdangz neix ndaej gaiq daihcibhaj daengx guek bouxcoz nyezrauh conhyez diuqfoux doxdax gimciengj.

Ciuq cam rox, aen sedonz diuqfoux aen hagdangz neix laebbaenz daeuj, haenqrengz yenzgiu gofoux gak minzcuz Gvangjsih, mboujduenh vat- cimh minzcuz vwnzva yenzsu, bien caux baenzdauq diuqfoux nyuenz miz neix, gungganq le buek youh buek lwghag, hawj gyoengqde diuq foux seiz roxyiuj yisuz minzcuz, hawj gyoengqde baenz boux swnjcienz vwnzva minzcuz. Baez neix, aen cezmuz diuqfoux 《Ciengq Denhyauz》gyoengqde camgya doxdax haenx, aeu aendingzdingj gaeuqgeq Bouxcuengh Gvangjsih guh hoenz, youq cienz ciengq seiz yienh’ok yaem’wenq aen dingzdingj goksadsad. Biujyienj ndeiyawj ndaejdaengz youq- ciengz guekgya gaep vujdaujgyah caeuq gyoengq bingzveij haenhndei. Baez “seizdaih ndawhag·foux doengh Sanghaij” gaiq daihcibhaj daengx guek bouxcoz nyezrauh conhyez diuqfoux doxdax neix comz le 105 aen cezmuz ndeiyawj daengx guek gak dieg, doxdax gig haenq. Doeklaeng, 《Ciengq Denhyauz》 aen hagdangz neix aeu ndaej gimciengj, caemhcaiq ndaej daengx guek “byawz dwg fouxvuengz” vangjloz heiqvunz baizmingz buengj daihhaj mingz.

(Veiz Yih/韦 祎)