Bonjbauq siusik (gicej Liengz Cingz) 3 nyied 4 hauh banhaemh, daengx guek yinzda daibyauj、 Gvangj- sih Bouxcuengh Swcigih Minzcuz Cunghgyau Swvu Veijyenzvei dangjcuj suhgi Luz Yenbenj youq Baekging ciepsouh Gvangjsih Densidaiz gicej caijfangj, caijfangj sibinz youq haemhhaenx 《Gvangjsih Sinhvwnz》 cezmuz boqcuengq.

《Gvangjsih Sinhvwnz》 cezmuz cuengq ok: Aen Hoih Cibngeih Gaiq Daengx Guek Yinzda Haj Baez ngoenzcog couh yaek haimuq lo, ngoenzneix, Gvangjsih daengx guek yinzda daibyauj dawzgaenj seizgan coihgaij ndeicaez yian、 genyi, daibyauj Luz Yenbenj naeuz yaek ciuq gij vwndiz baujhoh seiqgyaiq yizcanj daezok daibyauj genyi. De lwnh gicej, “bi’gvaq, vehbangxdat Byaraiz Cojgyangh Gvangjsih swnhleih bauq baenz yizcanj, gyahwnj bi 2014 Gahswhdwz Vanzgyangh ndaej senj haeuj seiqgyaiq swhyienz yizcanj (caeuq Gveilinz bingzbaiz). Seizneix, Gvangjsih miz song dieg seiqgyaiq yizcanj, hoeng ngaenzcienz Gvangjsih haemq mbang- nyieg, doiq baujhoh seiqgyaiq yizcanj gingniemh mbouj gaeuq, gaenjbik aeu ndaejdaengz guekgya lai haeujcoengh caeuq bangcoh.” Daengx guek song hoih bineix, daibyauj Luz Yenbenj caepcawq daezgyau 《Gij Genyi Mizgven Caenh’itbouh Haeujcoengh Gvangjsih Haiguh Hong Gvendaengz Seiqgyaiq Yizcanj》.

Daibyauj Luz Yenbenj naeuz, “lumj Byaraiz, de mboujdan dwg vehbangxdat, riuzcienz roengzdaeuj lij miz gienz Byaraiz, lij miz ndangdaenj, lij miz yaem’wenq dem. Baenzneix dou youq fuengmienh neix aeu caeuq guekgya feihvuzciz vwnzva yizcanj mizgven cwngcwz dox gvanlienz, ndaej hawj haeujcoengh, gyalai ligdoh baujhoh doengzseiz, cauhfuk beksingq vunzlai dieg yizcanj, hawj beksingq vunzlai ndaej gij leih’ik caencaen saedsaed yawj ndaej raen de.”

Dangguh daengx guek yinzda siujsoq minzcuz daibyauj、 Gvangjsih Minzcunghveij dangjcuj suhgi, Luz Yenbenj youq daengx guek song hoih bineix lij yaek daezok song hangh genyi wnq: It dwg gij genyi mizgven caenh’itbouh bangfuz ywdoj Boux- cuengh hwngfat, ngeih dwg gij genyi mizgven caenh’itbouh gyalai ceiok hawnjhoengq dieg minzcuz.

主办：广西区民语委

出版：广西民族报社

出版周期：逢星期三出版

出版期数：总第3264期

Daengx Guek Yinzda Daibyauj Luz Yenbenj Ciepsouh Gvangjsih Densidaiz Gicej Caijfangj:

Genyi Guekgya Gyalai Ligdoh Haeujcoengh Gvangjsih Haiguh Hong Baujhoh Seiqgyaiq Yizcanj

全国人大代表卢献匾接受广西电视台记者采访:

建议国家加大对广西开展世界遗产保护工作的支持力度