Ndit banringz raeujrubrub, ciuq youq gwnz ndang cwxcaih dangqmaz. Gou caeuq baengzyoux ndei Lij Mingzveij youq ndaw hongh guhcaemz.

Sawqmwh, Lij Mingzveij doeksaet dwk sing hung hemq naeuz:“Miz ngwz!” Gou gig geizheih, ganjgip buet gvaqbae yawj. Va, dwg duz ngwz ndeu dahraix! Aenndang duzngwz mongmwt, miz raizva, dinghdingh boemz youq goek ciengz, mbouj doengh saek di. Gou mbeihung bw, duz ngwz iq neix gou cix mbouj lau ne. Gou byaij gyawj duzngwz, sijsaeq yawj. Mwngz yawj, duzngwz cingq hai aenda iq de yawj gou ne, aenndang lumj miz di saenz, nanzdauh duzngwz lau gou?

Dou buet haeuj ranz bae heuh daxbuz daeuj. Daxbuz ra daeuj diuz faex iq ndeu, iet daengz daej ndang duzngwz bae, yungh rengz baez deuq, duzngwz deng deuq daengz gizwnq bae lo.

Doeklaeng gou cam daxbuz: “Duzngwz vihmaz youq ndaw hongh raeuz okyienh ne?” Daxbuz yawjyawj mbawlig, riu lo, de naeuz: “Ngoenzneix dwg cietheiq gingcig ndaw ngeihcib seiq aen cietheiq haenx, gvaiq mbouj ndaej duzngwz cungj okdaeuj byaijdoengh lo.” Gou dingq mbouj rox daxbuz gangj gijmaz, ganjgaenj cam:“Gijmaz dwg ‘gingcig’ ha?” Daxbuz naeuz: “Gingcig dwg ngoenz gwnzmbwn byajraez gingdoengh doenghduz ninz gvaqdoeng haenx. Daj ngoenz- neix hwnj, vwnhdu ndaw namh hainduj menhmenh bienq sang, doenghduz ninz gvaqdoeng haenx ciemhciemh ndiu daeuj, seizcin gaenq daeujdaengz lo!”

“O, laxlawz dwg yienghneix ha!” Gou fwt rox lo. Gingcig ging ngwz ndiu, caen mizyinx!

(it nienzgaep Goz Dunghhwz)