Yenz lauxsae cingj Dangz Dahaij doeg cozvwnz de, de hemhem aensing de, singhung doeg naeuz:

“Yenz lauxsae doiqdaih dou lumj doiqdaih lwg caenseng ityiengh, daidu de cungj dwg baenzneix unqswnh, gangjvah cungj dwg baenzneix caenciet. Yenz lauxsae cijaeu yawj dou mbat he, couh ndaej daj gij saenzcingz dou rox boux doengzhag lawz ndangdaej mbouj cwxcaih, boux doengzhag lawz bungz daengz saeh simnyap.

“Gou nyex mazfanz hawj Yenz lauxsae daiq lai lo, hoeng Yenz lauxsae cix mbouj aenvih yienghneix dwgcaengz gou. Fanj gvaqdaeuj, de gizgiz gvensim gou、bang gou. Gou lau sij cozvwnz, de cungj dwg naihsim gujli gou, son gou.”

Ndaw cozvwnz Dangz Dahaij, lij sij haujlai youhdenj Yenz lauxsae. Doeg sat cozvwnz le, Dangz Dahaij maqmuengh dwk lauxsae biujyangz de, de cez da coh Liuz Yenz, gij yiengh de geijlai saenzheiq ha.

Ndawsim Liuz Yenz miz di mbouj fug, hix yaengx fwngz iugouz doeg cozvwnz swhgeij, Yenz lauxsae doengzeiq lo.

Liuz Yenz mbouj vueng mbouj muengz doeg dwk. De dwg sij Lij lauxsae, ndawde miz duenh ndeu dwg yienghneix sij:

“Lij lauxsae mbouj dandan doiq gunghcoz gig fucwz, de hix gig gyaez hagseng. Vihliux ndaej dawz engqlai cinglig cuengq youq gwnz ndang hagseng, de dawz dahlwg ngamq ndaej seiq bi haenx soengq bae ranzdaiq, cijmiz ngoenzsinghgiz mehlwg cij ndaej doxraen. Miz baez ndeu, dahlwg de bingh lo, daengx ngoenz daej dwk hemq aeu daxmeh, hoeng ndaw ban boux doengzhag cingzcik haemq ca he hix bingh lo, Lij lauxsae siengj: Cingzcik boux hagseng neix gaenq riengz mbouj hwnj lo, caiq lot roengz baenz lai gunghgo couh engq ca lo, de doiq hagsib couh saetbae saenqsim. Yienghneix, Lij lauxsae dawz siengj- niemh caeuq yousim dahlwg cuengq youq simdaej, mbouj bae yawj dahlwg, dauqfanj ngoenzngoenz daengz ndaw ranz boux doengzhag baenzbingh haenx bae bang de boujgoq, moix baez cungj bouj ndaej gig gvaiz. Aenvih daj gyanghaet itcig nyaengq daengz gyanghaemh, daengz mwh ninz, Lij lauxsae cungj baeg ndaej lumj fouqndok sanqgyaq nei. Gyahcangj caeuq boux doengzhag neix gig gamjdoengh, boux doengzhag neix bingh ndei le haenqrengz hagsib, cingzcik daezsang gig vaiq…… Lij lauxsae dwg boux vunz gou ceiq gingqboiq haenx. ”(4)