Daxboh gou dwg boux caepranz he. Naengnoh de gig ndaem, gou rox haenx dwg aenvih de daengx bi youq rog ranz guhhong deng ndit dak cij ndaem.

Daxboh itcig youq gunghdi guhhong, mbouj miz geijlai seizgan buenx dou. Hoeng, cijaeu ndaej hoengq, daxboh couh naengh roengzdaeuj baenz yiengh baenz yiengh genjcaz cozyez gou caeuq daegnuengx, de miz seiz nyaeuq bwnda, miz seiz ngaek gyaeuj, miz seiz riunyumj. Beizheiq daxboh gig ndei, mbouj doiq dou fatheiq gvaq. Daxboh hix gig miz naihsim, bungz daengz daez cozyez dou sij loek haenx, de couh gig miz naihsim baez youh baez son dou, cigdaengz gou caeuq daegnuengx cungj rox bae.

Gou geiq ndaej, daxboh mbouj gvaq ngoenzseng gvaq. Bineix daengz ngoenzseng daxboh ngoenz haenx, gou caeuq daegnuengx laeglemx yungh gij cienz dou rom ndaej haenx cawx aen dangauh ngoenzseng he, lij bang daxmeh guh daiz byaek ndei gwn he, yaek hawj daxboh gingheij. Mwh haeuxcaeuz, daxboh daenj dauq buh cungj uq gienghsuijniz he dauqma lo. Baez haeuj dou, daxboh couh sibgvenq ndwn youq bakdou duet geu buh uq de bae. Mwhhaenx, gou caeuq daegnuengx dawz aen dangauh, ciengq go ngoenzseng sawqmwh byaij daengz baihnaj daxboh bae. Gou yawjraen daxboh gyaengj youq lo, de yungh rengz nyepnyep aenbak, da cungj nding lo, gou siengj daxboh itdingh dwg gamjdoengh lo!

(sam nienzgaep Gauh Yijveih)