Yenz lauxsae lumj bingzseiz ityiengh, naj riunyumj byaij haeuj gyausiz, de baez yawj couh yawjraen aen cuzgiuz henz gyangjdaiz, ndawsim de haengjdingh siengj: Boux giuzmaez neix ngoenzneix baenzlawz dawz aen baujboiq de cuengq youq gizneix ha? Yenz lauxsae yawj gyausiz mbat he, yawjraen Dangz Dahaij haen aennaj naengh youq gizhaenx, haujlai doengzhag hix gig gaenjcieng. De riu le riu naeuz:“Ngoenzneix dwg goq- cozvwnz, gyoengq doengzhag gaej gaenjcieng, cuengqsoeng di, cijndaej cungfaen dawzok gij siengjsiengliz swhgeij, sij ok bien cozvwnz ndei ndeu daeuj.”

“Yenz lauxsae,” Lij Cing ndwn hwnjdaeuj, “ngoenzneix mwngz hawj dou gag dingh daezmoeg cozvwnz ndaej lwi?” Yenz lauxsae gyaengj mbat he, riengz dwk riu naeuz: “Dangyienz ndaej ha.” Lij Cing ciep- dwk gangj roengzbae:“Haxbaenh Dangz Dahaij caeuq Liuz Yenz vih ceiq boiqfug boux lauxsae lawz cenglwnh, daezmoeg cozvwnz ngoenz- neix couh sij ‘bouxvunz gou ceiq gingqboiq’, ndaej lwi?” Yenz lauxsae yawj laj gyangjdaiz geijcib doiq lwgda cungj dwg maqmuengh haenx, yaeng’yaeng ngaekngaek gyaeuj.

Yenz lauxsae gangj gij iugouz cozvwnz le, giengzdiuh sij bien cozvwnz neix seiz, itdingh sij caensaed. Lij naeuz daj daezmoeg yawj, neix dwg bien cozvwnz sij vunz he, hoeng saedcaeq dwg doenggvaq saehcingz daeuj fanjyingj moux fuengmienh binjciz boux vunz yaek sij haenx, ndigah yaek sij saehcingz gidij di.

Gyoengq doengzhag rox gij neiyungz cozvwnz le, couh nyinhcaen naemj hwnjdaeuj. Mwngz yawj, Dangz Dahaij ngoenzneix mbouj najmbwng lo, youq gizhaenx buekmingh naemj dwk, de sij ndaej gig swnh, gyaeuj hix mbouj ngiengx saek mbat, cij dingqnyi sing sij cih “sasa”. Duzroeg lij youq gwnz nyefaex rog cueng “cici caca” hemq mbouj dingz, Dangz Dahaij di ndeu cungj mbouj deng cauz daengz.

Dangz goq ndeu gvaqbae lo, dingzlai doengzhag daejgauj gaenq daj ndei lo. Mwh hwnj dangz daihngeih, Yenz lauxsae naeuz:“Dangz neix raeuz sien dawz cozvwnz geij boux doengzhag daeuj gangjbingz mbat he, yienzhaeuh caiq gaij.” Vah Yenz lauxsae ngamq gangj sat, mbouj noix doengzhag yaengx fwngz hwnj, cungj maqmuengz doeg cozvwnz swhgeij hawj daihgya dingq, fwngz Dangz Dahaij yaengx ndaej ceiq sang.

(3)