Caiq gvaq aen lai singhgiz, couh daengz ngoenzseng gou ndaej 9 bi lo, ngoenz he banngaiz, gou cuengqhag ngamq ma daengz ranz, daxmeh riunyumnyum lwnh gou naeuz:“Swjyenz, vaiq daeuj yawj- yawj, daxboh mwngz geiq laex ngoenzseng daeuj hawj mwngz lo.”

Daxboh youq diegrog gizgyae guhhong, bingzseiz gig nyaengq, hoeng de mbouj lumz ngoenzseng gou gvaq.

Gou ganjgip cek doxgaiq bau gij laex haenx daeuj yawj, va, dwg aen habbit gyaeundei he, gou angq raixcaix. Gienh saeh song ndwen gonq sawqmwh yienh youq baihnaj gou. Ngoenz haenx dwg ngoenz gaxgonq daxboh yaek liz ranz bae diegrog guhhong, de raen habbit gou gaenq gaeuqvaih lo, naeuz yaek cawx aen moq he hawj gou, gek baenzlai nanz lo, daxboh lij geiq ndaej, caemhcaiq youq yaek daengz ngoenzseng gou dangguh laex ngoenzseng soengq hawj gou, daxboh caen dwg boux vunz miz sim he ha, hawj gou gikdoengh dangqmaz.

Gou gyaez aen habbit neix, engq gyaez daxboh gou. Gou gag roengz gietsim, itdingh ndeindei hagsib, aeu cingzcik ndei daeuj docih caeuq bauqdap daxboh gyaez gou haenx.

(sam nienzgaep Cuh Swjyenz)