Mwh gou ndaej sam seiq bi, daxmeh cawx bonj saw dozveh he hawj gou, gou yawj ndaej gig haeujmaez, aiq dwg youq seizde, gou caeuq saw couh miz yienzfaenh gig laeg lo.

Mwh iq gou yawjsaw, cijdwg doeg daihgaiq, mbouj daj ndawde roxdaengz gijmaz dauhleix laeg. Mwh yawj《Sihyouzgi》, gou yied yawj yied haeujmaez, daj ndaw saw fatyienh le haujlai doxgaiq mizyinx moq. Mwh dauq yawj baez daih- ngeih, gou itmienh doeg itmienh naemj, dijvei ok engq lai yinx- daeuz. Doeklaeng, gou couh miz cungj sibgvenq cau coenzvah ndei roengzdaeuj, neix doiq gou miz haujlai ndeicawq, doiq gou sij cozvwnz ndaej bang haujlai. Riengz dwk doegsaw yied daeuj yied lai, cozvwnz suijbingz gou hix daezsang haemq sang.

Miz baez ndeu, lauxsae hawj dou sij bien cozvwnz daezmoeg dwg《Seizcou Daeujdaengz Lo》. Dang lauxsae doeg bien fanvwnz he le, daihgya cungj doengzcaez sij ok “seizcou daeuj lo, mbawfaex henj lo, baenz mbaw baenz mbaw loenq daengz gwnz dieg”. Gou gag siengj, daihgya cungj baenzneix sij, daiq mbouj miz eiqsei lo. Yienghneix, gou sijsaeq dauqngeix faenzcieng gvendaengz “seizcou” gou doeg gvaq haenx, giethab gij gingniemh ndaw gwndaenj, vuenh cungj sijfap he:“Dahsau seizcou yamq dwk yamqdin mbaeumbwt daeujdaengz gizneix, baenz mbaw baenz mbaw, dawz seizcou mbaet roengzdaeuj, cuengqhaeuj ndaw swx iq bae. Dahsau seizcou yungh genbuh de, cw ndit ndat, dangj rumz gyoet, dawz mak gva homfwd soengq hawj gyoengqvunz. Vunzlai cungj gyaez de, gyaez de mbwn’gvengq rumz- liengz, gyaez de gva hom mak van.” Yienghneix, cozvwnz gou ndaej hawj lauxsae dangguh fanvwnz youq gwnz ban doeg okdaeuj.

Gou rox, doegsaw sawj vunz cinbu. Gou itdingh youq saw buenx gou lajde mboujduenh majhung.

(haj nienzgaep Hau Bozdaz)