●Vih guh ndei hong guh iengangq bi 2017, Cingsih Si Vadung Cin Dangjveij、 Cwngfuj caeux dungyenz、 caeux anbaiz、 caeux doeksaed, baij ok 10 aen doih fugsaeh bang bouxguhnaz, bae daengz gyang reih gyang naz vih ranz ndaem ien fugsaeh, baujcwng hong senj din’ien ndaem roengz naz bae guh ndaej swnhleih.

(Vangz Anhcungh)

●Seizcin daengz lo, Denzyangz Yen Gohgigiz cujciz doih fugsaeh sonyinx gohgi, daengz Bohhungz Cin Ginzvaz Cunh haiguh son’gyauq din- fwngz ndaem makgaivaiz、 makbug nohnding、 makmaenj sanhvaz daengj. Dangzgoq beizyin hopheux gij hong seizcin guenjleix dinfaex、 fuengz binghhaih nonhaih、 dinfwngz raed nga daengj, yungh lauxhangz hwnjdangz、 daengz dieg sonyinx、 fatcuengq swhliu mbouj aeu cienz daengj hingzsik guh, soundaej yaugoj gig ndei.

(Vangz Gozsun Loz Ginzdauj)

●Bi 2017 ndwencieng geizgan, Lungzanh Yen Naz- dungz Cin Cinliuz Cunh banh coux cieng vwnzyi vanjvei、 yienj Heiqbegvah、 biujyienj fouxgvangjcangz daengj haujlai hangh vwnzdij hozdung, yinx ndaej 6000 lai boux vunzlai siujsoq minzcuz aen cunh neix nem cunh henzgyawj daeuj yawj, hawj gyoengq vunzmbanj yiengjsouh mbat vwnzdij ngaiz- hoengh he.

(Cangh Li)

●Gaenh bi neix daeuj, Yinhcwngz Yen yungh “yenj- cwngz gyauyuz” guh ingbaengh, hawj gyoengq bouxguhnaz mbouj yungh ok mbanj couh ndaej daj gwnz muengx hag ndaej dinfwngz dajndaem dajciengx, roxyiuj gij saenqsik baenz fouq caeuq hawciengz siugai daengj, sonyinx boux- guhnaz hwngfat gij canjnieb miz daegsaek. Lij leihyungh yenj- cwngz gyauyuz bingzdaiz, son- gyauq bouxguhnaz guh guenjleix reihnaz、 fuengzyw binghhaih nonhaih、dinfwngz baenz fouq daengj, ciuq dieg bae hwngfat deihfueng dajndaem dajciengx ginghci.

(Lanz Cunghcwngz)