Gwzlijswhdinaz·Lahgyahdwz seng youq Fazgoz ranz ndawranz bouxboux cungj roxsaw miz dungxcaiz he, bohmeh cungj dwg daihhag gyausou. Ndawranz gyauyuz vanzging gig ndei de, sawj de baenz boux ceiq ak ndaw doengz nienzgeij haenx. Daihhag bizyez le, de cix mbouj ndaej senj hwnj Bahliz Cwngci Yozyen ndaej heuh guh “yauzlanz cwngci’gyah” haenx. Mbouj ndaej senj hwnj, sawj de gig doeknaiq, daxmeh gaenq duiyouh de haenx ciep de ma ranz lo.

Youq aenhongh laeng ranz de, daxmeh ciengx duz gaeqmeh he ngamq faeg ok cibgeij duz gaeqlwg. Ngoenzhaenx banringz, de raen daxmeh youq henz rongzgaeq caep aen bonamh sang 1 mij, raez 10 mij he. Daxmeh mwh gueng gaeq, mbouj dwg dawz haeux cienzbouh vanq okbae, cix dwg byaij yamq he, youq gwnz dieg vanq geij naed haeux, dang gaeqlwg gwn gij haeux vanq gwnz dieg sat le, daxmeh couh caiq byaij yamq he vanq geij naed. Gaeqlwg hainduj lij byaij saemxsaemx saxsax, menhmenh dwk, yamq din bienqbaenz mbaeumbet lo. Daxmeh laebdaeb itmienh vanq haeuxnaed, itmienh byaij hwnj gwnz bo bae, gaeqlwg hix riengz daxmeh, baez yamq baez yamq benz daengz dingjbo lo.

Mwh daxmeh guh gienh saeh neix, Lahgyahdwz hix nyaenx mbouj ndaej riengz gaeqlwg byaij hwnj bo bae. Daengz dingjbo le, de cij ngeizrwd cam daxmeh:“Vih maz mbouj dawz haeux cienzbouh vanq youq gwnz bo ne? Yienghneix couh mbaet haujlai seizgan.” Daxmeh lwnh de naeuz:“Danghnaeuz dawz haeux cungj vanq youq gwnz bo, ciuq gij rengz gaeqlwg seizneix, dwg gig nanz byaij daengz dingjbo. Cijmiz baez yamq baez yamq yinx de, gyoengqde cij ndaej byaij daengz diegdaemx. Couh lumj mwngz seizneix, cingq youq giz youqgaenj ciuhvunz mwngz, mbouj ndaej aenvih itseiz mbouj swnh couh doeknaiq, engq mbouj ndaej siengj yamq ndeu guh baenz. Cijmiz baez yamq baez yamq byaij baenaj, cijndaej saedyienh gij muzbyauh doeklaeng mwngz.”

Gij vah daxmeh sawj ndawsim Lahgyahdwz sawqmwh ronghmyag. De doiq daxmeh naeuz:“Mwngz dwg lwnh gou, yaek saedyienh gij siengjmuengh hungmbwk, couh yaek saedyienh siengjmuengh iq gonq.” Daxmeh yawj dwk de riu lo, ndaw da yubyab gij rongh maq- muengh.

Daj seizde hwnj, Lahgyahdwz geiqmaenh gij vah daxmeh, itcig netsaed nyinhcaen byaij baenaj, doeklaeng youq 2011 nienz, ndaej senj hwnj Gozci Hobi Gihginh Cujciz cungjcaiz, baenz boux cungjcaiz mehmbwk daih’it aen cujciz neix. (Cangh Dazmingz)